थप दुई सचिव उदास र पाण्डेले पाए अवकास

सचिवविहीन निकाय छवटा पुगे
काठमाडौं, १८ मंसिर– थप दुई महत्वपूर्ण निकाय मन्त्रालय भूमिसुधार र रक्षा मन्त्रालय सचिवविहीन भएका छन् । भूमिसुधारका ज्ञानदर्शन उदास र रक्षाका आत्माराम पाण्डेले ५८ वर्ष उमेर पूरा गरी हालै अनिवार्य अवकास पाएपछि थप दुई मन्त्रालय सचिवविहीन भएका हुन् ।
उदास र पाण्डेको अवकासस“गै सचिव रिक्त निकायको संख्या ६ वटा पुगेको छ । भूमिसुधारमा वरिष्ठ सहसचिव कृष्णराज बीसी र रक्षा मन्त्रालयमा वरिष्ठ सहसचिव देवेन्द्र सिटौलालाई कामु सचिवको जिम्मेवारी दिइएको छ ।
यसअघि नै सार्वजनिक खरिद अनुगमन कार्यालय, प्रधानमन्त्री तथा मन्त्रिपरिषद् कार्यालय, राष्ट्रिय सतर्कता केन्द्र र उपराष्ट्रपति कार्यालय सचिवविहीन भइसकेका छन् । ती निकायमा वरिष्ठ सहसचिवहरू अनुपकुमार उपाध्याय, भोला शिवाकोटी, मधु रेग्मी र हरिकुमार श्रेष्ठलाई कामु सचिवको जिम्मेवारी दिइएको छ ।
सचिवहरू उदास, पाण्डे, नवीनकुमार घिमिरे, हरिराम कोइराला, उद्धव बा“स्कोटा र धरणीधर खतिवडाले अवकास पाएपछि ६ वटा निकाय सचिवविहीन भएका हुन् । पुस र असार मसान्तमा मात्र वरिष्ठ सहसचिवहरूमध्येबाट सचिवमा बढुवा गर्ने कानुनी व्यवस्था भएकाले कम्तीमा पनि थप डेढ महिना ती निकाय प्रशासनिक नेतृत्वविहीन रहनेछन् ।