सशस्त्रको बढुवा यथास्थितिमा राख्न आदेश

काठमाडौं, २६ चैत– सर्वोच्च अदालतले सशस्त्र प्रहरी बलको प्रहरी उपरीक्षक (एसपी) को बढुवा सिफारिस रोक्का राख्न सरकारलाई अन्तरकालीन आदेश दिएको छ ।

न्यायाधीश पुरुषोत्तम भण्डारीको एकल इजलासले चैत ५ मा सशस्त्र प्रहरीमा ३७ प्रहरी नायब उपरीक्षक (डीएसपी) लाई एसपीमा बढुवा गर्न गरिएको सिफारिस कार्यान्वयन नगर्न आदेश दिएको हो ।

आफूभन्दा कनिष्ठलाई बढुवाका लागि सिफारिस गरिएको दाबी गरी डीएसपीद्वय लेखनाथ खनाल र अच्युत मजगैयाँले सर्वोच्चमा रिट दायर गरेका थिए । रिटमा बहस गर्दै वरिष्ठ अधिवक्ता बद्रीबहादुर कार्की, रामकृष्ण निराला र रुद्र शर्माले अन्यायपूर्ण तवरबाट सशस्त्र प्रहरी बलमा बढुवाको सिफारिस गरिएकाले त्यसलाई रोक लगाउन माग गरेका थिए ।