इन्जिनियरसहित दुई जनाविरुद्ध भ्रष्टाचार मुद्दा

काठमाडौं, २७ भदौ– अख्तियार दुरुपयोग अनुसन्धान आयोगले बनेपा नगरपालिकाका इन्जिनियर आकाश श्रेष्ठसहित दुई जनाविरुद्ध बिहीबार विशेष अदालतमा भ्रष्टाचार मुद्दा दायर गरेको छ । श्रेष्ठले २०७२ को महाभूकम्पले पूर्ण क्षति भएको घर पुनर्निर्माणका लागि सरकारले प्रदान गरेको राहत किस्ता भुक्तानीका क्रममा सेवाग्राहीसँग २५ हजार रुपैयाँ घूस लिएको छानबिनबाट पुष्टि भएकाले उनीविरुद्ध मुद्दा दायर गरिएको अख्तियारले जनाएको छ ।

अख्तियारले जिल्ला अदालत सिराहाका कर्मचारी बृजमोहन यादवविरुद्ध समेत मुद्दा दायर गरेको छ । यादवले अदालतमा विचाराधीन लागू औषधसम्बन्धी मुद्दा मिलाइदिन्छु भनी सेवाग्राहीस“ग १ लाख १० हजार रुपैयाँ घुस लिएको पुष्ट भएकाले उनीविरुद्ध भ्रष्टाचार मुद्दा दायर गरिएको अख्तियारले विज्ञप्तिमा उल्लेख गरेको छ । मुद्दा दायर भएसँगै दुवै जना सेवाबाट निलम्बित भएका छन् ।