राष्ट्रियसभामा प्रश्न– ‘कति जना मरेपछि डेंगुले महामारीको रूप लिन्छ ?’

काठमाडौंं, २५ भदौ– राष्ट्रियसभाको बुधबार बसेको बैठकमा मुलुकभर डेंगुले महामारीका रूप लिइसक्ता पनि सरकार गम्भीर नभएकामा चर्को विरोध भएको छ ।
प्रतिपक्षी कांग्रेसका सांसद राधेश्याम अधिकारीले महामारीको रूप लिइसकेको डेंगुको संक्रमण नियन्त्रण गर्नका लागि संकटकाल घोषणा नगरेकामा सरकारको तीव्र आलोचना गरे । विशेष समय लिएर बोल्दै उनले डेंगु लागेका सबैको निःशुल्क उपचारको व्यवस्था गर्न सरकारसित माग गरे ।
‘डेंगुले महामारीको रूप लिइसक्ता पनि सरकार कुहिरोको काग बनेको छ । यसलाई अंग्रेजीमा ‘क्लुलेस’ भनिन्छ । मुलुकका ७७ जिल्लामध्ये ५६ जिल्लामा फैलिएको यो संक्रमण राष्ट्रिय महामारी हो कि होइन । राष्ट्रिय विपत्ति मान्नु पर्छ कि पर्दैन ? स्वास्थ्यको क्षेत्रमा यस्तो विपत्तिको सामना गर्न संकटकाल घोषणा गर्नु पर्छ कि पर्दैन ?’ डेंगुबाट मुलुकभर ६ जनाको मृत्यु भइसकेको उल्लेख गर्दै उनले भने– ‘कति जनाको मृत्यु भएपछि महामारीको रूप लिन्छ ?’

उनले बाँके–बर्दियामा डेंगु फैलँदा समयमै सरकारले नियन्त्रणको प्रभावकारी प्रयास नगर्दा मुलुकभर महामारीको रूप फैलिएको बताए । उनले ३ सय ५० रुपैयाँमात्र पर्ने डेंगु जाँच गर्ने किटको प्राइभेट अस्पतालहरूले २ हजार ६ सय रुपैयाँसम्म लिने गरेको उल्लेख गर्दै बिपतका बेला कालोबजारी गर्नेलाई कारबाही गर्न सरकारसित माग गरे ।
अधिकारीले डेंगु नियन्त्रणका लागि सरकारले के गरिरहेको छ भन्नेबारेमा सिंगो संसद र आमजनताले जान्न चाहेको बताए । उनले डेंगु परीक्षणको सुविधा नभएका जिल्लाहरूमा संक्रमण नियन्त्रण गर्न सरकारले चालेको कदमबारे सदनलाई जानकारी गराउनसमेत माग गरे ।