पशुपति कोषलाई विद्युतीय गाडी सहयोग

काठमाडौं, ११ मंसिर– भारतीय महिला संघले पशुपति विकास कोषलाई सहयोगस्वरूप दुइटा विद्युतीय सवारी साधन प्रदान गरेको छ । पशुपतिनाथ मन्दिरमा दर्शन गर्न आउने अशक्त तीर्थयात्रीलाई परिसरमा आउजाउ गर्नका लागि ती सवारी साधन सहयोग गरेको हो । उच्च–गुणस्तरको लिथियम आयन ब्याट्रीजडित ती सवारी साधन आठ सिट क्षमताका छन् ।

संघकी अध्यक्ष नम्रिता पुरीले पशुपति क्षेत्र विकास कोषका सदस्यसचिव प्रदीप ढकाललाई पशुपति परिसरमा बुधबार ती सवारी साधन हस्तान्तरण गरेको भारतीय दुतावासले जनाएको छ । संघ भारतीय राजदूतावासको संरक्षकत्वमा रहेको भारतीय महिलाहरूको संगठन हो ।