५ लाख घूस खाने मालपोत अधिकृतविरुद्ध मुद्दा

काठमाडौं, ३० मंसिर– मालपोत कार्यालय सिरहाका निमित्त प्रमुख मालपोत अधिकृत रामबाबु मण्डलविरुद्ध अख्तियार दुरुपयोग अनुसन्धान आयोगले सोमबार विशेष अदालतमा भ्रष्टाचार मुद्दा दायर गरेको छ । मण्डलले सेवाग्राहीसित ५ लाख रुपैयाँ घूस लिएको छानबिनबाट पुष्टि भएकाले उनीविरुद्ध मुद्दा दायर गरिएको आयोगले जनाएको छ ।
मण्डलले उच्च अदालत जनकपुर, राजविराज इजलासको पुनरावेदनमा विचाराधीन मुद्दाको सिलसिलामा सेवाग्राहीको नाममा कायम हुन आएको खुल्ने निर्णयसहितका कागजात उपलब्ध गराउन आनाकानी गरी घूस लिएको आयोगको विज्ञप्तिमा उल्लेख छ । ५ लाख बिगो कायम गरी डेढ वर्ष कैद र जरिवाना गर्न अख्तियारले आरोपपत्रमा मागदाबी गरेको छ ।