आज प्रधानन्यायाधीशमा शर्माको नाम सिफारिस हुने

दोस्रो बैठकले तीन संवैधानिक निकायमा पदाधिकारी नियुक्त गर्ने
काठमाडौं १६ चैत– प्रधानमन्त्री सुशील कोइरालाले प्रधानन्यायाधीश नियुक्तिको सिफारिस गर्न सोमबार बिहान संवैधानिक परिषद्को बैठक बोलाएका छन् । परिषद् बैठकको एजेन्डा प्रधानन्यायाधीश नियुक्तिको सिफारिस गर्ने रहेको जानकारी प्रधानमन्त्री निकटस्थ स्रोतले दिएका छन् ।
परिषद्को बिहीबार बोलाइएको बैठक विपक्षी दलका नेता (एमाओवादी अध्यक्ष) पुष्पकमल दाहाललाई पुत्री शोक परेकाले बस्दै नबसी स्थगन भएको थियो । परिषद्को सोमबार बस्ने पहिलो बैठकले कायममुकायम प्रधानन्यायाधीश दामोदर शर्मालाई प्रधानन्यायाधीशमा नियुक्तिको सिफारिस गर्ने जानकारीसमेत स्रोतले दिएको छ ।
मुलुकमा २०४६ सालको जनआन्दोलनबाट बहुदलीय व्यवस्था पुनःस्थापना भएपछि सर्वोच्चका वरिष्ठ न्यायाधीशलाई प्रधानन्यायाधीश नियुक्त गर्ने परम्परा बसालिएको छ । शर्मा वरिष्ठ न्यायाधीशका नाताले कामु प्रधानन्यायाधीश छन् ।

प्रधानन्यायाधीशको हैसियतमा मन्त्रिपरिषद्का अध्यक्ष नियुक्त खिलराज रेग्मीले कांग्रेस सभापति सुशील कोइराला प्रधानमन्त्री नियुक्त भएकै दिन माघ २७ मा सर्वोच्च न्यायिक पदबाट राजीनामा दिएपछि उक्त पद रिक्त थियो । रेग्मी मन्त्रिपरिषद्मा नियुक्त भएपछि शर्मा झन्डै एक वर्षदेखि कामु प्रधानन्यायाधीश छन् ।
परिषद्ले शर्मालाई प्रधानन्यायाधीश नियुक्तिको सिफारिस गरेपछि उक्त निर्णय संसद्को सुनुवाइ समितिमा पठाइनेछ । संसद्ले सुनुवाइ समितिसमेत गठन गरिसकेको छ । सुनुवाइ समितिबाट शर्माको नाम अनुमोदन भएपछि राष्ट्रपतिले उनलाई प्रधानन्यायाधीश नियुक्त गर्नेछन् ।
पहिलो पटक परिषद्ले निवर्तमान हुन लागेका प्रधानन्यायाधीशको अनुपस्थितिमा नया“ प्रधानन्यायाधीश नियुक्तिको सिफारिस गर्ने भएको छ । हाल प्रधानन्यायाधीश नभएकाले त्यस्तो स्थिति आएको हो । यसअघि निवर्तमान हुन लागेका प्रधानन्यायाधीशसहितको परिषद् बैठकले नया“ प्रधानन्यायाधीश नियुक्तिको सिफारिस गर्ने प्रचलन थियो ।
प्रधानन्यायाधीश नियुक्तिपछि सर्वोच्चमा रिक्त १० स्थायी न्यायाधीश नियुक्तिको समेत बाटो खुल्नेछ । प्रधानन्यायाधीश नभएकाले न्याय परिषद्को बैठक बस्न पाएको छैन । न्यायाधीश कम भएकाले सर्वोच्चमा न्याय निरूपणमा ढिलाइ भई सयौं मुद्दा थुप्रिएर बसेका छन् ।
परिषद्को दोस्रो बैठकले संवैधानिक निकायहरू मानव अधिकार आयोग, अख्तियार र लोकसेवा आयोगमा रिक्त पदमा समेत नियुक्तिको सिफारिस गर्नेछ । दोस्रो बैठक प्रधानमन्त्रीले सोमबार नै परिषद्का सदस्यहरूसित छलफल गरी छिट्टै बोलाउने भएका छन् । मानव अधिकार आयोगमा अध्यक्षसहित सबै पदाधिकारी, अख्तियारमा तीन आयुक्त र लोकसेवामा दुई सदस्य रिक्त छन् ।