छ सचिव बढुवाका लागि १६ सहसचिवको नाम सिफारिस

वरिष्ठबाट मल्ल र खुल्ला पाँच सचिवमा १५ जनाको नाम सिफारिस
काठमाडौं, २ साउन– सरकारले विभिन्न मन्त्रालय र निकायमा रिक्त छ सचिव बढुवाका लागि १६ जना सहसचिवको नाम सिफारिस गरेको छ । लोकसेवा आयोगकी कार्यवाहक अध्यक्ष कयोंदेवी यमीको अध्यक्षतामा बसेको बढुवा समितिको बैठकले उनीहरूको नाम सिफारिस गरेको जानकारी स्रोतले दिए ।
स्रोतका अनुसार अध्यादेशमार्फत् संशोधित निजामती ऐनको रिक्त पदमध्ये २० प्रतिशत सिटमा सबभन्दा वरिष्ठलाई सिफारिस गर्ने नया“ व्यवस्थाअनुसार रिक्त छ सचिवमध्ये एक पदका लागि बढुवा गर्न सबभन्दा ज्येष्ठ सहसचिव राजकुमार मल्लको नाम सिफारिस गरेको छ । रिक्त पदमध्ये २० प्रतिशतमा जति पद छन्, त्यति जनामात्र सिफारिस गर्ने र सरकारले उनैलाई बढुवा गर्नुपर्ने प्रावधान निजामती ऐनमा छ ।
मल्ल २०५२ सालमा सहसचिवमा बढुवा भएका सबभन्दा वरिष्ठ सहसचिव हुन् । संशोधित नया“ व्यवस्थाअनुसार सबभन्दा वरिष्ठबाट सचिवमा बढुवा हुन पाउने मल्ल पहिलो सहसचिव हुनेछन् । वरिष्ठ भए पनि कार्यसम्पादन मूल्यांकन नम्बर काटिएका कारण उनी यसअघि एक पदका लागि तीन जनाका दरले सिफारिस हुने प्रक्रियाबाट सचिवमा बढुवा हुन पाएका थिएनन् ।
कार्यसम्पादन मूल्यांकन र वरिष्ठताका आधारमा पदोन्नति हुने बा“की पा“च सचिवमा बढुवाका लागि समितिले निजामती ऐनअनुसार आवश्यकताभन्दा तेब्बर संख्यामा १५ जना सहसचिवको नाम सिफारिस गरेको छ । मन्त्रिपरिषदको आगामी बिहीबार बस्ने मन्त्रिपरिषद बैठकले सिफारिस भएकामध्येबाट छ जनालाई सचिवमा बढुवा गर्ने सम्भावना रहेको स्रोतले उल्लेख गरेको छ ।
निजामती ऐनको सचिव पदका लागि तेब्बर संख्यामा सिफारिस गर्ने प्रावधानअनुसार समितिले ५ सचिवका लागि पा“च वर्ष सेवा अवधि पूरा गरेका सहसचिवहरूमध्येबाट कार्यसम्पादन मूल्यांकन र ज्येष्ठताका आधारमा बढुवा गर्न १५ जनाको नाम सिफारिस गरेको हो ।
सचिव बढुवाका लागि सिफारिस भएका सहसचिवमा वरियताक्रमअनुसार अर्जुनबहादुर थापा, अनुपकुमार उपाध्याय, श्रीरञ्जन लाकौल, शंकरप्रसाद अधिकारी,  हरिकुमार श्रेष्ठ, नारायण रेग्मी, उत्तमनारायण मल्ल, ङइन्द्रप्रसाद उपाध्याय, लोकदर्शन रेग्मी, रञ्जनकृष्ण अर्याल, मधु रेग्मी, भूपेन्द्रबहादुर बस्नेत, भोला शिवाकोटी,  शरदचन्द्र पौडेल र नरेन्द्रमान श्रेष्ठ छन् ।
सचिव बढुवामा सिफारिस भएका सहसचिवमा प्रशासन समूहका ७, परराष्ट्र सेवाका एक,  प्राविधिक चार र कानुन सेवाका तीन जना छन् । सिफारिस भएकामध्ये ङइन्द्रप्रसाद उपाध्याय प्रधानमन्त्री तथा मन्त्रिपरिषद कार्यालयमा कायममुकायम सचिव छन् ।
सर्वोच्च अदालतको आदेशमा बढुवा समितिले निजामती सेवाको प्रशासन समूहतर्फको रिक्त सचिव बढुवाका लागि पहिलोपटक न्याय सेवाका सहसचिवहरूको नामसमेत सिफारिस गरेको छ । सर्वोच्चले विभिन्न मन्त्रालय र निकायको सचिव बढुवामा न्याय सेवा (कानुन, वकालत र न्याय प्रशासन समूह) का सहसचिवलाई समेत सम्भाव्य उम्मेदवार बनाउन चार महिनाअघि सरकारलाई आदेश दिएको थियो ।
विभिन्न मन्त्रालय र निकायका सचिवहरू यज्ञ गौतम, भगवतीकुमार काफ्ले, शीतलबाबु रेग्मी, रणबहादुर श्रेष्ठ, तिलकराम शर्माले ५८ वर्ष उमेर पुगी अनिवार्य अवकास पाएको र परराष्ट्रसचिव दुर्गा भट्टराई संयुक्त राष्ट्रसंघका लागि स्थायी प्रतिनिधिमा नियुक्त भएपछि ६ पद रिक्त भएको हो । परराष्ट्र मन्त्रालय, चारवटा क्षेत्रीय प्रशासन कार्यालय (पश्चिमाञ्चलबाहेक) र प्रधानमन्त्री तथा मन्त्रिपरिषदको कार्यालयमा सचिव पद रिक्त छन् ।

परराष्ट्र मन्त्रालयमा परराष्ट्र सेवाकै सचिव राख्ने परम्परा रहेकाले सिफारिस भएकामध्ये अर्जुनबहादुर थापा सचिवमा बढुवा हुने प्रायः निश्चित रहेको स्रोतले उल्लेख गरेको छ । विभिन्न मन्त्रालय र निकायमा कार्यरत प्रशासनतर्फका विभिन्न समूहका सहसचिवहरूले कानुन सेवाका सहसचिवहरूलाई आफ्नो र प्रशासनतर्फ दुवैतर्फ सचिवमा बढुवा हुन पाउने पक्षपातपूर्ण व्यवस्थाको विरोध गर्दै आएका छन् । त्यही कारण कानुन सेवाका तीन सहसचिव सिफारिसमा परे पनि सचिव बढुवा एक जनासम्ममात्र पर्ने सम्भावना रहेकोसमेत स्रोतले उल्लेख गरेको छ ।