उपनिर्वाचनमा साउन १६ सम्म १८ वर्ष पुगेका मतदाता

काठमाडौं, १९ साउन– आगामी उपनिर्वाचनमा साउन १६ (बिहीबार) सम्म १८ वर्ष उमेर पूरा भएका व्यक्ति मात्र मतदाता हुने भएका छन् ।
मन्त्रिपरिषद्ले बिहीबार निर्वाचन आयोगको सिफारिसमा प्रतिनिधिसभा सदस्य, प्रदेशसभा सदस्य र स्थानीय तहका रिक्त पदका लागि मंसिर १४ गते उपनिर्वाचन गराउने मिति तोकेको छ । आयोगले उपनिर्वाचनको मिति तोकिएको दिनसम्ममा १८ वर्ष उमेर पूरा भएका व्यक्तिमात्र मतदाता हुने पाउने जानकारी दिएको छ । आयोगका अनुसार उपनिर्वाचनमा मत दिन साउन १६ सम्ममा मतदाता नामावलीमा नामसमेत दर्ता भइसकेको हुनुपर्नेछ । १८ वर्ष पुगे पनि मतदाता नामावलीमा नाम दर्ता नगराए उपनिर्वाचनमा मत दिन पाइने छैन ।
आयोगले साउन १६ सम्म संकलन भएका मतदाताको विवरण अद्यावधिक गरी उपनिर्वाचन प्रयोजनका लागि आयोगमा पठाउन जिल्ला निर्वाचन कार्यालयलाई निर्देशनसमेत दिएको छ । आयोगको शुक्रबार बसेको बैठकले उपनिर्वाचन हुने सबै जिल्लामा साउन १७ देखि लागू हुने गरी नया“ मतदाता नामावली संकलन कार्य रोकेको छ ।

मतदाता नामावली ऐनअनुसार जिल्ला निर्वाचन कार्यालय, जिल्ला प्रशासन कार्यालय र इलाका प्रशासन कार्यालयमा सञ्चालन भइरहेको मतदाता दर्ता र अद्यावधिक कार्य अर्को निर्णय नभएसम्म रोकिएको जानकारी आयोगले दिएको छ ।
मंसिर १४ मा प्रतिनिधिसभा सदस्य १, प्रदेशसभा सदस्य ३, उपमहानगरपालिका प्रमुख १, गाउ“पालिका अध्यक्ष ३, उपाध्यक्ष १, गाउँपालिका र नगरपालिका वडाध्यक्ष ४१ गरी ५० पदका लागि उपनिर्वाचन हुनेछ । ती पदका लागि ३६ जिल्लामा उपनिर्वाचन हुनेछ । मिति तोकिएसँगै उपनिर्वाचनको तयारीलाई तीव्रता दिइएको आयोगले जनाएको छ ।