ललितपुरका न्यायाधीश आत्रेय तानिए

काठमाडौं, २६ पुस– न्याय परिषदले ललितपुर जिल्ला अदालतका न्यायाधीश विश्वमंगल आत्रेयलाई आफ्नो  सचिवालयमा तानेको छ । आत्रेयको न्याय सम्पादन प्रक्रियामा गम्भीर प्रश्न उठेपछि उनलाई सचिवालयमा काजमा तानिएको जानकारी स्रोतले दिएको छ ।

स्रोतका अनुसार प्रधान न्यायाधीश चोलेन्द्रसमसेर जबराले न्यायाधीशमाथि निगरानी राख्न न्यायपरिषद सचिवालयका सचिव नृपध्वज निरौलाको संयोजकत्वमा गठन गरेको संयन्त्रको प्रतिवेदन आएपछि आत्रेयलाई ‘कारबाही गर्न’ काज सरुवा गरिएको हो ।

निरौलाको नेतृत्वको संयन्त्रले ललितपुर जिल्ला अदालतमा छड्के अनुगमन गरेको थियो । जिल्ला अदालतका फैसलामाथि उठेका गुनासाहरूको सुनुवाइसमेत संयन्त्रले गरेको थियो ।

मलेसिया रोजगारीमा जाने कामदारको स्वास्थ्य परीक्षण र भिसा प्रोसेसिङका नाममा अबैध रूपमा ३ अर्ब रुपैया“भन्दा ठगी गरेको भन्दै सरकारले भीएलएनका सञ्चालक रामकुमार श्रेष्ठविरुद्ध मुद्दा दायर गरेको थियो । न्यायाधीश आत्रेयले मंसिर २६ मा ठगी मुद्दामा श्रेष्ठलाई सफाइ दिएपछि उनीविरुद्ध न्याय परिषदमा उजुरीसमेत परेको थियो । उनका अरू फैसलामाथि समेत बदनियत देखिएको दाबी संयन्त्र स्रोतले गरेको छ ।