दोषीलाई बचाउने खेल नहोस् : नयाँ शक्ति

काठमाडौं, १९ पुस– नयाँ शक्ति पार्टीले संसदीय छानविन उपसमितिले वाइठ बडी जहाज खरिद प्रकरणमा कारवाहीका लागि सिफारिस गरेका बहालवाला मन्त्री, सचिव र महाप्रबन्धकलाई नैतिकताका आधारमा राजिनामा दिन माग गरेको छ ।

’हामी छानविन उपसमितिको यस कदमको हार्दिक स्वागत गर्छौं’ नयाँ शक्तिले बिहीबार जारी विज्ञप्तिमा भनेको छ, ’बस्तुतः उपसमितिले गरेको छानविन र ठहरका आधारमा मन्त्री, सचिव र महाप्रबन्धक समेतलाई अब आफ्नो ओहदामा रहिरहने नैतिक आधार एक क्षण पनि रहँदैन ।’

विज्ञप्तिमा कुनै पनि बहानामा छानबिन उप समितिको सिफारिस र ठहरलाई उल्ट्याउने दुष्प्रयास नगर्न र अनियमितताको अझै गहिरो छानविन गरी सम्पूर्ण दोषीमाथि शीघ्र कार्वाही गर्न माग गरिएको छ । दोषीहरुलाई बचाउने दुष्प्रयास कतैबाट भएमा संघर्षमा उत्रिन बाध्य हुने चेतावनीसमेत नया“ पार्टीले दिएको छ ।