वडा सदस्य घुससहित पक्राउ, फरेस्टरविरुद्ध मुद्दा

काठमाडौं, १८ जेठ– अख्तियार दुरुपयोग अनुसन्धान आयोगले महोत्तरीको एकडारा गाउँपालिका–४ का वडा सदस्य रामचन्द्र राय (यादव) लाई घुस रकमसहित पक्राउ गरेको छ ।

गाउँपालिकाको बजेटबाट निर्माण हुने धर्मशालाको रकम निकासा गराउन सहज गराइदिन सेवाग्राहीसँग ३६ हजार रुपैया“ घुससहित वडा सदस्य राय शुक्रबार पक्राउ परेको अख्तियारले जनाएको छ । उनलाई हिरासतमा राखी थप अनुसन्धान भइरहेको छ ।

अख्तियारले सव–डिभिजन वन कार्यालय, चौरजहारी, रुकुम (पश्चिम) का फरेस्टर महेन्द्र बीसीविरुद्ध विशेष अदालतमा भ्रष्टाचार मुद्दा दायर गरेको छ । बीसीले कु–काठ कटान आदेशको काममा सहजीकरण गर्ने प्रयोजनका लागि सेवाग्राहीसँग ७ हजार रुपैयाँ घुस लिएको पुष्टि भएकाले उनीविरुद्ध मुद्दा दायर गरिएको अख्तियारले जनाएको छ ।