स्वैच्छिक मृत्युवरण अधिकारको माग

काठमाडौं, १३ असार– प्रतिनिधिसभाको महिला तथा सामाजिक समितिको बैठकमा मुलुकमा ज्येष्ठ नागरिकलाई स्वैच्छिक मृत्युवरणको अधिकार दिनुपर्ने माग गरिएको छ । समितिको शुक्रबारको बैठकमा ज्येष्ठ नागरिकसम्बन्धी विधेयकमाथि छलफलमा वयोवृद्ध सरोकारवालाले उक्त माग गरेका हुन् ।

वरिष्ठ पत्रकार भैरव रिसालले ज्येष्ठ नागरिकलाई स्वैच्छिक मृत्युवरण गर्न पाउने कानुनी व्यवस्थाका लागि संघीय संसद्समक्ष माग गरे । ९२ वर्षीय रिसालले धेरै विद्वान् र धनी छोराछोरीका बाबुआमाले समेत बुढेसकालमा कठिनका साथ जिउनुपरेको उल्लेख गर्दै विकसित मुलुकहरूमा जस्तै त्यस्ता ज्येष्ठ नागरिकले चाहेमा स्वैच्छिक मृत्युवरण गर्न पाउने कानुनी अधिकार दिन आग्रह गरेका हुन् ।

सुन्दा नमीठो लागे पनि ज्येष्ठ नागरिकले यस्तो इच्छा व्यक्त गर्ने गरेको पाइएको उनले उल्लेख गरे । रिसालले विश्वका कतिपय मुलुकमा निको नहुने तर बढी पीडा हुने रोग लागेका ज्येष्ठ नागरिकले चाहेमा स्वैच्छिक मृत्युवरण गर्न पाउने कानुनी व्यवस्था रहेको तर्र्फ समेत समितिको ध्यानाकर्षण गराए ।

उनले ज्येष्ठ सासूससुरालाई राम्रोस“ग स्याहार गर्ने बुहारीमध्येबाट उत्कृष्टलाई पुरस्कार दिने कानुनी व्यवस्था गर्नसमेत समितिलाई सुझाव दिए । यस्तो कानुनी व्यवस्थाले ज्येष्ठ नागरिकहरूको हेरचाहका लागि सामाजिक रूपमै जागरण ल्याउने विश्वाससमेत उनको थियो ।

समितिको बैठकमा राष्ट्रिय ज्येष्ठ नागरिक महासंघका अध्यक्ष एवं वरिष्ठ कलाकार मदनदास श्रेष्ठले ज्येष्ठ नागरिकहरूलाई वृद्धाश्रममा नभई घरमै पालनपोषण गर्ने बाध्यकारी कानुनी व्यवस्था गर्न समितिलाई आग्रह गरे । उनले ज्येष्ठ नागरिकलाई निःशुल्क स्वास्थ्य बिमा गर्ने व्यवस्था विधेयकमा राखिएकामा खुसीसमेत व्यक्त गरे । विधेयकमा वृद्ध बाबुआमालाई पालनपोषण नगर्ने छोराछोरीलाई ३ लाख जरिवाना र ५ वर्षसम्म जेल सजाय दिने प्रावधान राखिएको छ । श्रेष्ठले ज्येष्ठ नागरिकको पालनपोषणका लागि नैतिक शिक्षाको उचित व्यवस्था गर्नसमेत समितिलाई आग्रह गरे ।