दुई वर्ष अगाडि नै कृषि सचिव जीसीद्वारा राजिनामा

काठमाडौं, २५ माघ– कृषि तथा पशुपन्छी विकास मन्त्रालयका सचिव युवकध्वज जीसीले पदावधि दुई वर्ष बाँकी छँदै पदबाट राजिनामा दिएका छन् । विदेशमा आकर्षक रोजगारीमा जान सचिवको ५ वर्षे पदावधि पूरा हुनु दुई वर्ष अगाडि नै जीसीले राजिनामा दिएका हुन् ।
जीसी विश्व खाद्य कार्यक्रमको बैंककस्थित एसिया तथा प्यासिक क्षत्रीय कार्यालयमा आकर्षक रोजगारीमा छनौट भइसकेको र एक महिनापछि नै बैंकक जान लागेको जानकारीसमेत प्रधानमन्त्री तथा मन्त्रिपरिषद कार्यालय स्रोतले दिएको छ । स्रोतका अनुसार माघ मसान्तदेखि लागू हुने गरी जीसीले दिएको राजिनामापत्र मन्त्रिपरिषदमा पेस भई स्वीकृतिको क्रममा रहेको छ ।
खुला प्रतिस्पर्धाबाट सहसचिव बनेका जीसी २०७३ माघ ६ मा सचिवमा बढुवा भएको थिए । उनको पदावधि २०७८ माघ ५ सम्म छ । राजिनामा दिए पनि जीसीको पेन्सन या उपदानका लागि सेवा अवधि भने बढ्ने छैन । सचिवको ५ वर्षे पदावधि पूरा गर्दा पनि पेन्सन नपाक्ने भएकाले जीसीले २ वर्ष अगावै सेवाबाट बिदा भएर अर्को जागिरमा जान लागेको जानकारी कृषि मन्त्रालय स्रोतले दिएको छ ।

२० वर्ष सेवा अवधि नपुग्ने भएकाले उनले सरकारबाट पेन्सन पाउने छैनन् । उनले १६ वर्ष सेवा गरेबापत सरकारबाट उपदान पाउने छन् । खुल्ला प्रतिस्पर्धाबाट उनले निजामती सेवाको कृषि समूहमा सहसचिवमा सेवा प्रवेश गरेका हुन् । सचिव हुनुअघि उनी कृषि विभागका महानिर्देशक थिए । यसअघि सोझै सहसचिवमा सेवा प्रवेश गरी सचिवबाट अवकास भएका दीपेन्द्रविक्रम, थापा, कृषि समूहकै उत्तम भट्टराई र नरबहादुर रजवारसमेत २० वर्षभन्दा कम सेवा अवधिमात्र पुगेकाले बिना पेन्सन उपदान लिएर अवकास भएका थिए । खुल्ला प्रतिस्पर्धाबाट ४५ वर्षसम्ममा सोझै सहसचिवमा सेवा प्रवेश गर्न पाइने व्यवस्था छ । सहसचिवमा ३८ वर्षमा प्रवेश गरेको व्यक्तिले मात्र २० वर्ष सेवा अवधि पूरा गरी पेन्सन पाउन सक्छन् । त्योभन्दा बढी उमेरमा सेवा प्रवेश गरेका व्यक्तिले भने २० वर्ष नपुग्ने भएकाले पेन्सन पाउँदैनन् ।