वन अधिकृतसहित चारविरुद्ध मुद्दा

काठमाडौं, २२ माघ– अख्तियार दुरुपयोग अनुसन्धान आयोगले रूपन्देहीको सैनामैना सव(डिभिजन वन कार्यालयका वन अधिकृत पुष्पराज श्रेष्ठसहित ४ जनाविरुद्ध बिहीबार विशेष अदालतमा भ्रष्टाचार मुद्दा दायर गरेको छ । ती चार जनाले सेवाग्राहीसित घूस लिएको छानबिनबाट पुष्टि भएकाले मुद्दा दायर गरिएको अख्तियारले जनाएको छ ।
मुद्दा दायर गरिएकामा श्रेष्ठका अतिरिक्त पर्साको नापी कार्यालय, वीरगञ्जका सर्भेक्षक रामनरेश पासवान, विद्युत प्राधिकरणको कार्यालय कुलेश्वरका कृष्णमुरारी चौधरी र कुँवर कन्स्ट्रक्सनका पुरुषोत्तम दाहाल छन् । घूस लेनदेन गरेकामा चौधरी र दाहाललाई अभियुक्त बनाइएको हो । अख्तियारले अभियोगपत्रमा चारै जनालाई तीन महिनासम्म जेल सजाय र घूस रकमबराबर बगो कायम गरी जरिवाना गर्न मागदाबी गरेको छ ।