रेल्वे कम्पनी खारेज हुने

काठमाडौं, ११ माघ- सरकारले जयनगर-जनकपुर रेल साचालन गरिरहेको रेल्वे कम्पनी खारेज गर्ने भएको छ । भौतिक योजना तथा निर्माण मन्त्रालयले जनकपुरमा रहेको उक्त कम्पनी खारेज गर्न मन्त्रिपरिषदमा प्रस्ताव लाने तयारी गरेको जानकारी स्रोतले दिए ।
स्रोतका अनुसार रेल्वे कम्पनी खारेज भए पनि जयनगर-जनकपुर रेल्वे भने निरन्तर साचालन गरिनेछ । श्रम तथा यातायात मन्त्रालयमातहतमा रहेको उक्त कम्पनीलाई दुई महिनाअघि भौतिक योजनामातहतको रेल्वे विभागमातहतमा ल्याइएको छ । रेल्वे कम्पनीले गर्दै आएका काम विभागले गर्ने गरी खारेज गर्ने प्रकि्रया अघि बढाइएको जानकारी स्रोतले दिएको छ ।
'रेल्वे विभाग नै भएपछि छुट्टै कम्पनी आवश्यक छैन । त्यही कारण खारेज गर्न मन्त्रिपरिषदमा प्रस्ताव लाने गृहकार्य भइरहेको छ' भौतिक योजनाका एक अधिकारीले भने । कम्पनीमा २ सय कर्मचारी छन् । ती कर्मचारीलाई जयनगर-जनकपुर रेल्वे साचालन तथा भारतीय सहयोगमा निर्माण हुन लागेका जयनगरबाट बर्दिबास र जोगवनीबाट विराटनगर जोड्ने रेलमार्गको काममा लगाइने जानकारी ती अधिकारीले दिए ।
जयनगर-जनकपुर रेल्वे पहिला यातायात संस्थान मातहतमा थियो । राजधानीको ट्रली बसलगायतका सेवा बन्द भएपछि यातायात संस्थान खारेज भयो र जयनगर-जनकपुर रेल्वे साचालनका लागि छुट्टै कम्पनी खोलिएको हो ।