नारायणहिटी दरबारमा गणतन्त्र स्मारक

प्रतिष्ठानमा अधिकारी
 काठमाडौं, ३ चैत- सरकारले नारायणहिटी दरबारभित्रको पूर्वी क्षेत्रमा यसै आर्थिक वर्षदेखि गणतन्त्र स्मारक निर्माण थाल्ने भएको छ । मन्त्रिपरिषदको शुक्रबार बिहान बसेको बैठकले नारायणहिटी संग्रहालयको पूर्वी भागमा रहेको ८२ रोपनीमा गणतन्त्र स्मारक बनाउने निर्णय गरी त्यसका लागि आवश्यक पर्ने रकम उपलब्ध गराउन अर्थमन्त्रालयलाई निर्देशन दिएको जानकारी भौतिक योजना तथा निर्माण मन्त्री हृदयेश त्रिपाठीले दिएका छन् ।
सरकारले जनआन्दोलनबाट गणतन्त्र स्थापना भएको ऐतिहासिक घटनालाई सधैं स्मरण गराउने किसिमको आकर्षक स्मारक नारायणहिटी दरबार परिसरमै बनाउने निर्णय गरेको हो ।
त्रिपाठीका अनुसार सरकारले सरुवाको नियमावली संशोधन गरी निजामती कर्मचारी सरुवाको क्यालेन्डर परिवर्तन गरेको छ । यसअघि दुई वर्ष एक ठाउँमा बसिसकेका निजामती कर्मचारीको सरुवा माघ, फागुन र चैतको सट्टा निजामती नियमावली संशोधन गरी अब साउन, भदौ र असोजमा गर्ने व्यवस्था गरिएको छ ।
हालसम्म सामान्य प्रशासनले अन्तर मन्त्रालयबीच माघमा, मन्त्रालय र विभागले मातहतका कर्मचारीलाई फागुनमा र क्षेत्रीय कार्यालयले चैतमा सरुवा गर्दै आएका थिए । अब क्यालेन्डर परिवर्तन भएपछि सामान्य प्रशासनले अन्तर मन्त्रालयबीच साउनमा, मन्त्रालय र विभागले मातहतका कर्मचारीलाई भदौमा र क्षेत्रीय कार्यालयले असोजमा सरुवा गर्न पाउनेछन् ।
सरकारले अख्तियार दुरुपयोग अनुसन्धान आयोगको निर्देशन मन्त्री र सचिवबीचको असमझदारी र युनियनहरुको दादागिरीलगायतका कारण रोकिएको सरुवा पुनः गर्न मन्त्रिपरिषदले नियमावलीमा नै व्यवस्था गरी सबै मन्त्रालय विभाग र कार्यालयहरुलाई थप एक महिनाको समय दिएको छ ।
सरकारले राजधानीमा भइरहेको कानुन व्यवसायीहरुको सम्मेलन आयोजनाका लागि ७ लाख रुपैयाँ उपलब्ध गराउने निर्णय गरेको छ ।
प्रतिष्ठानमा अधिकारी
सरकारले परराष्ट्र मामिला अध्ययन प्रतिष्ठानको कार्यकारी निर्देशकमा डा। ऋषि अधिकारीलाई नियुक्त गरेको छ । उनी यसअघि मलेसियाका लागि राजदूत थिए ।