िसंचाइ सचिवको सरुवाको कुरा उठेपछि मन्त्री यादव र भट्टराईबीच पुनः विवाद

सचिव, विभागीय प्रमुखद्वारा तालाबन्दी र हडतालको चेतावनी
काठमाडौं, १२ चैत- िसंचाइ मन्त्रालय िसंचाइ र जलउत्पन्न प्रकोप नियन्त्रण विभागका महानिर्देशकद्वय क्रमशः अनिल पोखरेल र कमल रेग्मी तथा उनीहरु समर्थक कर्मचारीले सचिव वृन्दा हाडा भट्टराई को सरुवा गरिएमा मन्त्री महेन्द्रराय यादवको कार्यकक्षमा तालाबन्दी र हडताल नै गर्ने चेतावनी सरकारलाई दिएका छन् ।
सचिव भट्टराईको अध्यक्षतामा सहसचिवदेखि इन्जिनियर तहसम्मका कर्मचारीहरुको आइतबार बसेको बैठकले प्रधानमन्त्री बाबुराम भट्टराई र मुख्यसचिव माधव घिमिरेलाई हडताल र तालबन्दीमा उत्रने लिखित चेतावनी दिएको जानकारी स्रोतले दिएका छन् ।
मन्त्री यादवले सचिव भट्टराईलाई सरुवा गर्न मन्त्रिपरिषदमा प्रस्ताव राखेको सार्वजनिक भएपछि िसंचाइ मन्त्रालयमा राजनीतिक तथा प्रशासनिक नेतृत्वबीच पुनः विवाद चर्किएको हो । महानिर्देशकद्वय पोखरेल र रेग्मी सरुवामा आकर्षक ठाउँमा सरुवा पाएका कर्मचारीले मन्त्रीका विरुद्ध सचिवलाई साथ दिइरहेका छन् । राजनीतिक र प्रशासनिक नेतृत्वबीच विवाद बढेपछि कुनै पनि पक्षमा नलागेका कर्मचारीहरुले मन्त्री यादवलाई प्रधानमन्त्रीलाई कन्भिन्स गरी सचिव भट्टराईलाई सरुवा गरेर राम्रोसँग मन्त्रालय चलाउन या राजिनामा दिन सल्लाह दिएको जानकारी एक अधिकारीले दिए ।
सचिवको अध्यक्षतामा महानिर्देशकद्वय पोखरेल र रेग्मीको सकि्रयतामा उनीहरु समर्थक सहसचिवदेखि इन्जिनियर तहसम्मका कर्मचारीको बैठकले सचिव भट्टराईको सरुवा भएमा मन्त्रीको कार्यकक्षमा तालाबन्दी गर्ने र सम्पूर्ण कर्मचारी हडतालमा नै उत्रने लिखित निर्णय गरेको छ । त्यही निर्णयअनुसार िसंचाइ मन्त्रालयका अधिकारीहरुले प्रधानमन्त्री र मुख्यसचिवलाई सचिवलाई सरुवा नगर्न लिखित चेतावनी दिएका हुन् । चेतावनीपत्रमा सहसचिव पुरुषोत्तम शाहीबाहेक सबैजसो कर्मचारीले हस्ताक्षर गरेका छन् ।
बैठकमा सचिव भट्टराई महानिर्देशकद्वय पोखरेल र रेग्मी, मन्त्रालयका प्रशासन महाशाखा प्रमुख रवीन्द्र कर्माचार्य र उनीहरु समर्थक र सरुवाका क्रममा आकर्षक ठाउँ पाएका कर्मचारीको बढी सहभागिता थियो । िसंचाइ मन्त्रालयका कर्मचारीका तर्फबाट प्रधानमन्त्री र मुख्यसचिवलाई दिइएको चेतावनीपत्रमा राम्रो काम गर्दागर्दै सचिव भट्टराईको सरुवा गर्ने कुरा आउँदा आफूहरु मर्माहत भएको उल्लेख गरेका छन् ।
मन्त्रालय र मातहतका निकायमा २ सय ४१ जनाको सरुवामा आफ्ना मान्छे नपरेको भन्दै मन्त्री यादवले सचिव भट्टराईलाई अमर्यादित भाषामा गाली गरेपछि दुई जनाबीच विवाद उत्पन्न भएको थियो । सचिव भट्टराई र महानिर्देशकद्वयलगायतका कर्मचारीहरु आफू मन्त्री यादवसित काम गर्न नसक्ने भन्दै प्रधानमन्त्री र मुख्यसचिवसमक्ष उजुरी गर्न पुगेका थिए ।
त्यहीबीचमा प्रधानमन्त्रीको निर्देशनमा मन्त्री यादव र सचिव भट्टराईले सम्पूर्ण कर्मचारीहरुको बैठक बोलाई आफूहरु दुई जनाबीचको विवाद साम्य भएको भनी जानकारी एक साता नपुग्दै दुई जनाबीचको मतभेद उत्कर्षमा पुगेको हो । प्रधानमन्त्रीले यादव र भट्टराईलाई आफ्नो कार्यकक्षमा बोलाई गत सोमबार मिलेर काम गर्न निर्देशन दिएका थिए । त्यसको भोलिपल्ट यादव र भट्टराईले आफूहरु मिलेको घोषणा कर्मचारीहरुसमक्ष गरेका थिए ।
प्रधानमन्त्रीको निर्देशनमा 'हामी मिल्यौं' भने पनि दुई जनाबीचको झगडाको तुस बाँकी नै रहेकाले सचिव, विभागीय प्रमुख मन्त्रीको कार्यकक्षमा नजाने, फाइलसमेत राजनीतिक नेतृत्वसमक्ष पठाउने गरिएको थिएन । फेरि मन्त्रीबाट सचिव भट्टराईको सरुवाको कुरा उठेपछि दुई जनाबीच मतभेद बढेको हो ।
मन्त्री र सचिव तथा विभागीय प्रमुखहरुबीचको विवाद बढेको र कर्मचारीहरु मन्त्रीकै विरुद्ध प्रधानमन्त्रीसमक्ष गुहार्न हिडेपछि मन्त्रालयमा अराजकता उत्पन्न भएको छ । मन्त्रालयमा राजनीतिक र प्रशासनिक नेतृत्वबीचको झगडाले विभिन्न योजनाका काम रोकिएका छन् । मन्त्रीबाट स्वीकृत हुनुपर्ने फाइल उनीकहाँ पठाउन नै बन्द गरिएको छ ।
मन्त्री यादवले सचिव भट्टराई महानिर्देशकद्वय पोखरेल र रेग्मी प्रशासन महाशाखा प्रमुख रवीन्द्र कर्माचार्यसित फागुन ३० गते राति ९ बजेसम्म सरुवाबारे छलफल गरी भोलिपल्ट एकचोटि हेरेर सरुवाको सूची टाँस्ने निर्देशन दिएर मन्त्रालयबाट बाहिरिएका थिए । तर मन्त्रीको अनुपस्थितिमा सचिव भट्टराई महानिर्देशकद्वय पोखरेल रेग्मी प्रशासन महाशाखा प्रमुख कर्मचार्यले फागुन ३० राति नै निर्णय गरी मन्त्रीलाई सोध्दै नसोधी सरुवा गरिएका २ सय ४१ जनाको सूची टाँसेर सार्वजनिक गरेका थिए ।
स्रोतका अनुसार मन्त्रीले आफ्नातर्फबाट १९ जनाको नाम सरुवा गर्न सचिवलाई दिएका थिए । १९ जनामध्ये १० जनाको दुई वर्ष नपुगेकाले सरुवा गर्न मिल्दैन भनेपछि ९ जनालाई मात्र सरुवा गर्न मन्त्री सहमत भएका थिए । तर सरुवा सूचीमा ९ जनामध्ये ४ जना नपरेपछि आक्रोशित भएका मन्त्रीले सचिव भट्टराईलाई अमर्यादित ढंगले गाली गरेपछि विवाद भएको थियो ।
लामो समयदेखि मन्त्री र सचिवबीच समन्वय नहुँदा मन्त्रालयमा प्रथम श्रेणीमा बढुवा भएका पाँच जनाको पदस्थापनासमेत हुन सकेको छैन । पदस्थापना नभएका कारण भदौदेखि मन्त्रालयको बरण्डामा बस्न बाध्य सहसचिवहरुमा महाजन यादव, मथुरा डंगोल, राजेन्द्र अधिकारी र देवनारायण मिश्र छन् । प्रथम श्रेणीका अधिकारीले सरकारबाट गाडी सुविधा पाउने भए पनि पदस्थापना नभएकाले गाडी त परेको कुरा बस्ने कुर्चीसमेत पाएका छैनन् ।
आठ महिनादेखि पदस्थापना नभएकाले प्रथम श्रेणीका अधिकारी आयोजना प्रमुख हुनुपर्ने तीनवटा आयोजनामा द्वितीय श्रेणीका अधिकृत नै कायममुकायम प्रमुख भएर बसिरहेका छन् । मन्त्री र सचिवको झगडाका कारण कानुनविपरीत ढंगले सिक्टा िसंचाइ आयोजनाका कायममुकायम प्रमुख दिलीप कार्की त्यहीँ बसिरहेका छन् । बढुवा भएपछि मन्त्रालयमा आई सहसचिवको नियुक्ति लिएर पदस्थापना भएको ठाउँमा जानुपर्नेमा सिक्टाका कार्की 'म नै आयोजना प्रमुख हुँ' भनी उहीँ बसिरहेका छन् । रानीजमरा र सुनसरी-मोरङ िसंचाइ आयोजना प्रमुख प्रथम श्रेणीको अधिकारी रहने व्यवस्था भए पनि द्वितीय श्रेणीका अधिकारीलाई कामु प्रमुख बनाएर राखिएको छ । िसंचाइ विभागका डिभिजनल इन्जिनियर प्रकाश पौडेललाई कुनै काम नदिई डेढ वर्षदेखि दायित्वविहीन बनाएर राखिएको छ ।