चालू वर्षलाई बेरुजु फछ्र्यौटको नमुना वर्ष बनाउन निर्देशन

काठमाडौं, २३ असोज– सरकारले चालु वर्षलाई बेरुजु फछ्र्यौटको नमुना वर्षका रूपमा चिनाउने गरी काम गर्न सबै मन्त्रालय तथा निकायका सचिवहरूलाई निर्देशन दिएको छ । बेरुजु फछ्र्यौटका सम्बन्धमा मन्त्रिपरिषद्वाट अर्थमन्त्री शंकर कोइरालाको संयोजकत्वमा गठित मन्त्रीहरू टेकबहादुर थापा (घर्ती) र उमाकान्त झा सदस्य रहेको समितिको बुधबार बसेको बैठकले महालेखापरीक्षकको पछिल्लो ५० औ प्रतिवेदनले औल्याएका बेरुजुहरू फछ्र्यौटलाई तीव्रता दिन विभिन्न मन्त्रालय तथा निकायका प्रशासनिक नेतृत्वलाई आग्रह गर्दै त्यस्तो निर्देशन दिएको हो ।
बैठकमा अर्थमन्त्री कोइरालाले प्रमाण नेभटिएका, सोधानन्तर गर्नुपर्ने र लामो समयदेखि बेरुजु फछ्यौट हुन नसकिरहेका मुद्दामा विशेष कार्ययोजनासहित समितिसमक्ष प्रस्ताव पठाउनसमेत आग्रह गरेका छन् । कृषि विकासमन्त्री थापाले चालु वर्ष बेरुजु फछ्र्यौटमा उदाहरणीय काम गर्न आग्रह गर्दै लेखापरीक्षण र सम्परीक्षणको कामलाई समान रूपमा प्राथमिकतामा राख्नुपर्ने बताए ।
उर्जामन्त्री उमाकान्त झाले मोबिलाइजेसन पेस्की फछ्र्यौटका लागि विशेष पहल गर्न सचिवहरूलाई निर्देशन दिए । प्रधानमन्त्री तथा मन्त्रिपरिषद कार्यालयका सचिव एवं समितिका सदस्यसचिव कृष्णहरि बा“स्कोटाले बेरुजु फछ्र्यौटको विस्तृत कार्ययोजना तयार गरी मासिक रूपले बेरुजु फछ्यौटको लक्ष्य निर्धारण गरी असोज मसान्तभित्र समितिसमक्ष पेस गर्न आग्रह गरे ।
उनले कुल बेरुजुको अंकको विवरण यकिन गर्नुका साथै बेरुजुको निकायगत वर्गीकरण गर्ने, नियमित गर्नुपर्ने, असुल उपर गर्नुपर्ने बेरुजुको रकम यकिन गरी फछ्यौट गर्न विशेष क्रियाशीलता अवलम्बन गर्नुपर्ने बताए ।
उनले म्याद नाघेको पेस्की बेरुजु, मुद्दामा रहेको बेरुजु, मिनाहा गर्नुपर्ने बेरुजु रकम, कर्मचारी पेस्की वेरुजु र सोधानन्तर एवं सोधभर्नाको रकम यकिन गरी काम बाँडफाँड गरेर अभियानका रूपमा बेरुजु फछ्यौट गर्नुपर्ने बताए ।
बाँस्कोटाले महालेखा परीक्षकको डोर गएकै बेलामा नै सम्परीक्षण गर्ने व्यवस्था मिलाउन, सम्बन्धित निकायसँग छलफल गर्न, असुल उपर गर्नुपर्ने बेरुजुमा कडाइ गर्न र महालेखा परीक्षकको प्रतिवेदनमा औंल्याएका बेरुजुका सन्दर्भमा लिनुपर्ने कदम समितिसमक्ष पेस गर्नसमेत सचिवहरूलाई आग्रह गरे । प्रत्येक निकायमा बेरुजु फछ्र्यौटका लागि आन्तरिक संयन्त्र गठन गरी चुस्त र दुरुस्त ढंगले काम गरी यस सम्बन्धमा भए÷गरेका कामको प्रगति विवरण समयमै समिति समक्ष पठाउनसमेत समितिको बैठकले आग्रह गरेको छ ।