घूस लिने र दिनेविरुद्ध भ्रष्टाचार मुद्दा

काठमाडौं, १२ मंसिर– अख्तियार दुरुपयोग अनुसन्धान आयोगले घूस लेनदेन गरेको अभियोगमा ५ जनाविरुद्ध बिहीबार विशेष अदालतमा मुद्दा दायर गरेको छ ।
अख्तियारले घूस लिने यातायात व्यवस्था कार्यालय मोटरसाइकल गुर्जुधारा काठमाडौंका शाखा अधिकृत शुक्रप्रसाद भट्टराई र दिने किरण देउला, उत्तमविक्रम शाही, रमेशकुमार केसी र सुरेश छुस्याकीविरुद्ध मुद्दा दायर गरिएको अख्तियारले जनाएको छ ।
मोटरसाइकलको रजिस्ट्रेसन पास गर्नका लागि भट्टराई र रिकन्डिसन हाउसका प्रतिनिधिहरू देउला, शाही, केसी, छुस्याकीबीच घूस लेनदेन भएको अख्तियारको विज्ञप्तिमा उल्लेख छ । उनीहरूलाई बिगोबराबर जरिवाना र जेल सजाय गर्न अख्तियारले अभियोगपत्रमा मागदाबी गरेको छ ।

सागमा दुई दिन गाडीमा जोर र बिजोर प्रणाली

काठमाडौं, १२ मंसिर– १३ औं दक्षिण एसियाली खेलकुद (साग) मा राजधानीको चक्रपथभित्र ट्राफिक जाम हुन नदिन सबै निजी तथा सार्वजनिक सवारी साधनमा दुई दिन जोर र बिजोर प्रणाली लागू गरिने भएको छ ।
महानगरीय ट्राफिक प्रहरी महाशाखाले चक्रपथभित्र सागको उद्घाटनका दिन मंसिर १५ मा बिजोर र समापनका दिन मंसिर २४ गते जोर नम्बर प्लेटका गाडीमात्र चलाउन दिने भएको छ ।
महाशाखाले सागको उद्घाटन र समापनका दिन ट्राफिक जाम हुन नदिन दुई दिन जोर र बिजोर प्रणाली लागू गर्ने निर्णय भएको जनाएको छ । यो निर्णय सागको डेलिगेसन कार्ड भएका गाडी र अत्याावश्यक सवारी साधन दमकल, एम्बुलेन्स, पानी बोकेका गाडीमा लागू नहुनेसमेत महाशाखाले जनाएको छ ।

अब विकास आयोजनाहरूलाई विस्फोट पदार्थको आपूर्ति सहज : सेना

काठमाडौं, ११ मंसिर– नेपाली सेनाले विकास आयोजनाहरूलाई आवश्यक पर्ने विस्फोटक पदार्थको आपूर्ति प्रक्रिया थप सरल र व्यावहारिक बनाउने प्रतिबद्धता व्यक्त गरेको छ । आवश्यक विस्फोटक पदार्थ समयमै नपाएका कारण विकासनिर्माण कार्य अघि बढाउन समस्या परिरहेको गुनासो गर्दै आएका विकासे मन्त्रालयका अधिकारी र सरोकारवालाहरूसमक्ष सेनाले आपूर्ति प्रक्रिया व्यावहारिक र सरल बनाउने आश्वासन दिएको हो ।
सेनाको जंगी अड्डाले सरोकारवालाहरूसित बुधबार अन्तक्र्रिया गरी आफ्नो सुनाचारी इमल्सन प्लान्ट र स्वयम्भु बारुदखानाबाट उत्पादित विस्फोटक पदार्थको गुणस्तर र उत्पादन क्षमताको जानकारी दिई आपूर्तिको सुनिश्चितता र वितरण प्रक्रियालाई सहज बनाउने प्रतिबद्धता व्यक्त गरेको हो ।

पशुपति कोषलाई विद्युतीय गाडी सहयोग

काठमाडौं, ११ मंसिर– भारतीय महिला संघले पशुपति विकास कोषलाई सहयोगस्वरूप दुइटा विद्युतीय सवारी साधन प्रदान गरेको छ । पशुपतिनाथ मन्दिरमा दर्शन गर्न आउने अशक्त तीर्थयात्रीलाई परिसरमा आउजाउ गर्नका लागि ती सवारी साधन सहयोग गरेको हो । उच्च–गुणस्तरको लिथियम आयन ब्याट्रीजडित ती सवारी साधन आठ सिट क्षमताका छन् ।

संघकी अध्यक्ष नम्रिता पुरीले पशुपति क्षेत्र विकास कोषका सदस्यसचिव प्रदीप ढकाललाई पशुपति परिसरमा बुधबार ती सवारी साधन हस्तान्तरण गरेको भारतीय दुतावासले जनाएको छ । संघ भारतीय राजदूतावासको संरक्षकत्वमा रहेको भारतीय महिलाहरूको संगठन हो ।

टुटल र पठाओलाई चल्न देऊ : यातायातमन्त्री

काठमाडौं, ११ मंसिर– भौतिक पूर्वाधार तथा यातायातमन्त्री वसन्त नेम्वाङले निजी मोटरसाइकलमा यात्रुलाई सेवा दिंदै आएका टुटल र पठाओको सेवालाई यथावत रूपमा चल्न दिन निर्देशन दिएका छन् ।
मन्त्री नेम्वाङले यातायात व्यवस्था विभागका महानिर्देशक गोगनबहादुर हमाललाई बुधबार मन्त्रालयमा बोलाई लामो समयदेखि सञ्चालनमा रहेको सेवा रोकेकामा असन्तुष्टि व्यक्त गर्दै टुटल र पठाओलाई यथावत रूपमा चल्न निर्देशन दिएको जानकारी मन्त्रालय स्रोतले दिएको छ ।

पत्रकार कसजू रहेनन्

काठमाडौं, १० मंसिर– पत्रकार एवं बाल साहित्यकार विनयकुमार कसजूको मंगलबार निधन भएको छ । मुटु र श्वासप्रश्वाससम्बन्धी समस्याबाट पीडित कसजूको ललितपुरस्थित मेडिसिटी अस्पतालमा उपचारका क्रममा निधन भएको हो ।
निमोनियाका कारण गम्भीर बिरामी भएपछि उनलाई कात्तिक १९ मा मेडिसिटी अस्पतालमा भर्ना गरिएको थियो । गुल्मीको रिडीमा २००४ सालमा जन्मेका कसजूका श्रीमती र तीन छोरा छन् । उनी राष्ट्रिय सूचना आयोगका पहिलो अध्यक्ष हुन् । उनी राष्ट्रिय समाचार समिति (रासस) मा सञ्चालक समिति सदस्यसमेत भएका थिए ।
कसजू मुलुकमा ग्रामीण पत्रकारिता र सामुदायिक रेडियोका अभियन्ता मानिन्छन् । उनले देउराली पत्रिकासमेत प्रकाशन गरेका थिए । कसजूले पत्रकारिता र बाल साहित्यका माध्यमबाट बालबालिकालाई कविता र कथा लेख्न सिकाउन योगदान गरेका थिए ।

सवा ७ लाख भ्रष्टाचार गर्नेविरुद्ध मुद्दा

काठमाडौं, १० मंसिर– अख्तियार दुरुपयोग अनुसन्धान आयोगले पाल्पाको मोहन कन्या माध्यमिक विद्यालयमा भवन तथा शौचालय निर्माणका क्रममा सवा ७ लाख रुपैयाँ भ्रष्टाचार भएको ठहर गर्दै संलग्नविरुद्ध मंगलबार विशेष अदालतमा मुद्दा दायर गरेको छ ।

विद्यालय व्यवस्थापन समितिका अध्यक्ष देवराज ढकाल, प्रधानाध्यापक दीपकप्रसाद ज्ञवाली, पूर्वप्रधानाध्यापक केशलक्ष्मी श्रेष्ठ र तत्कालीन जिल्ला शिक्षा कार्यालय पाल्पाका सब–इन्जिनियर रामस्वरूप चौधरीले निर्माणका क्रममा नक्कली बिलभर्पाइ पेस गरी ७ लाख ३० हजार रुपैयाँ हिनामिना गरेको पुष्टि भएकाले मुद्दा दायर गरिएको अख्तियारले जनाएको छ ।

नियुक्ति आचारसंहिताविपरीत : निर्वाचन आयोग

काठमाडौं, १० मंसिर– निर्वाचन आयोगले भक्तपुर क्यान्सर अस्पताल व्यवस्थापन समितिद्वारा  डाक्टर र कर्मचारीको नियुक्ति निर्वाचन आचारसंहिता विपरीत रहेको ठहर गर्दै बदर गर्न निर्देशन दिएको छ ।
आयोगले भक्तपुरमा कात्तिक ८ देखि नै निर्वाचन आचारसंहिता लागू भइसकेकाले मंसिर ९ मा क्यान्सर अस्पतालमा गरिएको नियुक्तिको निर्णय आचारसंहिता विपरीत भएको ठहर गरेको हो ।
आयोगका प्रवक्ता राजकुमार श्रेष्ठद्वारा मंगलबार जारी विज्ञप्तिमा २४ घण्टाभित्र नियुक्ति बदर गर्न अस्पताललाई निर्देशन दिइएको उल्लेख छ । भक्तपुरको निर्वाचन क्षेत्र १ (क) मा प्रदेशसभा सदस्यका लागि मंसिर १४ मा उपनिर्वाचन हुँदैछ ।

मेडिकल कलेजलाई राष्ट्रियकरण गर ः डा. केसी

काठमाडौं, ९ मंसिर– मेडिकल कलेजले समयसीमाभित्र अतिरिक्त शुल्क फिर्ता नगरे सञ्चालकविरुद्ध ठगी मुद्दा र कलेजलाई राष्ट्रियकरण गर्न डा. गोविन्द केसीले माग गरेका छन् । आफैंले तोकेको शुल्क लागू गर्नुको सट्टा सरकारले बढी शुल्क लिने कलेजको संरक्षण गरिरहेको उनको आरोप छ ।
‘सरकारले दिएको पछिल्लो अल्टिमेटम सकिँदा पनि शुल्क फिर्ता नभएकाले तत्काल ठगी गर्नेहरूलाई पक्राउ गरेर फौजदारी मुद्दा चलाउन तथा मेडिकल कलेजहरूको राष्ट्रियकरणको प्रक्रिया सुरु गर्न पनि माग गर्दछौं,’ सोमबार डा. केसीले जारी गरेको विज्ञप्तिमा भनिएको छ । संरक्षणकै कारण शुल्कमा अर्बौं रुपैया“ कालोबजारी गर्नेहरू दण्डित हुनुको साटो पुरस्कृत हुँदै गएको उनको भनाइ छ ।

पशुपति कोषमा तीन सदस्य नियुक्त

काठमाडौं, ८ मंसिर– पशुपति क्षेत्र विकास कोष सञ्चालक समितिमा तीन जना सदस्य नियुक्त भएका छन् । संस्कृति, पर्यटन तथा नागरिक उड्डयन मन्त्रालयले मन्त्रीस्तरीय निर्णयबाट अर्जुनप्रसाद बा“स्तोला, विश्वकरण जैन र आशा पाण्डेलाई कोषको सदस्य नियुक्त गरेको हो । तीनै जना सदस्यको पदावधि चार वर्षको हुनेछ ।

मतपत्र सम्बन्धित ठाउँमा पु¥याइयो : आयोग

काठमाडौं, ८ मंसिर– निर्वाचन आयोगले मंसिर १४ गते हुने उपनिर्वाचनका लागि मतपत्र र मतदाता परिचयपत्र सम्बन्धित सबै जिल्लाका मुख्य निर्वाचन अधिकृतको कार्यालयमा पु¥याइसकिएको जनाएको छ ।
नेपाली सेनाले मतपत्र र मतदाता परिचयपत्र उपनिर्वाचन हुने ३७ जिल्लामध्ये सुगमस्थानमा गाडीबाट र दुर्गममा हेलिकप्टरको माध्यमबाट ढुवानी गरी पु¥याएको जानकारी आयोगले आइतबार दिएको छ ।

प्रधानमन्त्री रोजगार कार्यक्रमका संयोजकले धमाधम छाड्दै जागिर

• नियुक्त भएको ८ महिनामै १२५ जनाले छाडे, अरू पनि छाड्ने तयारीमा
• अब रोजगार संयोजक नियुक्तिको अधिकार स्थानीय तहलाई

घरपायक ठाउँमा जान नपाएको, बेजिल्ला र दुर्गममा परेको, पालिकाका निर्वाचित पदाधिकारीसित समन्वय हुन नसकेको र सहयोग नपाएको कारण देखाउँदै राजीनामा
काठमाडौं, ७ मंसिर– प्रधानमन्त्री रोजगार कार्यक्रम कार्यान्वयन गर्न केन्द्रबाट नियुक्त गरी ७ सय ५३ स्थानीय तहमा खटाइएका रोजगार संयोजकहरूले धमाधम राजीनामा दिइरहेका छन् । गत फागुन अन्तिम सातायता नियुक्त ७ सय ५३ रोजगार संयोजकमध्ये १ सय २५ जना राजीनामा दिएर स्थानीय तहबाट बिदा भइसकेको श्रम, रोजगार तथा सामाजिक सुरक्षा मन्त्रालयले जनाएको छ ।
ठूलो संख्यामा रोजगार संयोजकले छाडेपछि ५ अर्ब रुपैयाँ बजेट रहेको ‘महत्वाकांक्षी’ रोजगार कार्यक्रम कार्यान्वयनमै समस्या उत्पन्न हुने आशंका बढेको मन्त्रालयका अधिकारीहरू बताउँछन् ।

राउतको पार्टीद्वारा शक्ति प्रदर्शन

काठमाडौं, ७ मंसिर– सीके राउत नेतृत्वको जनमत पार्टीले राजधानी काठमाडौंमा शनिबार शक्ति प्रदर्शन गरेको छ । जनमत पार्टीले जुलुस प्रदर्शन गरी ‘रंगभेदविरुद्ध एकतासभा’ गरेको हो । प्रदर्शनका सहभागीले ‘नो रेसिजम’ लगायतका नारा अंकित प्ले कार्ड र ब्यानर बोकेका थिए । सभालाई सम्बोधन गर्दै नेता राउतले मुलुकमा रहेको रंगभेद अन्त्य गर्न आन्दोलन जरुरी रहेको बताए ।

‘पाइलापाइलामा रंगभेद छ । रंगभेद तपाईंको मन, मस्तिष्क र मानसिकतामा छ, त्यसलाई मेटाउन आन्दोलन जरुरी छ,’ उनले भने ।

हतियार बुझाउन गृहको आग्रह

काठमाडौं, ७ मंसिर– गृह मन्त्रालयले मंसिर १४ मा उपनिर्वाचन हुने ३७ जिल्लाका इजाजतप्राप्त हतियार मंसिर १० भित्र सरकारलाई बुझाउन आग्रह गरेको छ । मन्त्रालयले शनिबार सार्वजनिक सूचना जारी गरी उपनिर्वाचनलाई निष्पक्ष, शान्तिपूर्ण र भयरहित वातावरणमा सम्पन्न गराउन व्यक्तिगत हतियार नजिकको स्थानीय प्रहरी कार्यालयमा बुझाउन भनेको हो । 

कास्की, बागलुङ, दाङ, भक्तपुर, पाँचथर, भोजपुर, सुनसरी, मोरङ, संखुवासभा, खोटाङ, सप्तरी, सिराहा, महोत्तरी, सर्लाही, रौतहट, बारा, पर्सा, रामेछाप, सिन्धुपाल्चोक, काभ्रेपलाञ्चोक, काठमाडौं, चितवन, लमजुङ, नवलपरासी (पूर्व), गुल्मी, अर्घाखा“ची, कपिलवस्तु, प्यूठान, रोल्पा, बाँके, सल्यान, हुम्ला, बाजुरा, अछाम, डोटी, कञ्चनपुर र बैतडी जिल्लामा उपनिर्वाचन हुँदै छ । 

इन्जिनियरसहित तीन जनाविरुद्ध मुद्दा

काठमाडौं, ६ मंसिर– घूस लिएको अभियोगमा शुक्रबार अख्तियार दुरुपयोग अनुसन्धान आयोगले इन्जिनियरसहित तीन जनाविरुद्ध विशेष अदालतमा भ्रष्टाचार मुद्दा दायर गरेको छ । मुद्दा दायर गरिएकामा शिक्षा विकास निर्देशनालय प्रदेश ५ बुटवलका इन्जिनियर सन्दीप पौडेल र जेसीभी चालक विक्रम बस्नेत तथा पश्चिम रुकुम जिल्ला अदालतका नायब सुब्बा रमेशकुमार खड्का छन् ।

 इन्जिनियर पौडेल र चालक बस्नेतले विद्यालय भवन निर्माण सकिएर अन्तिम किस्ता भुक्तानीका क्रममा सेवाग्राहीसँग १ लाख २० हजार रुपैयाँ घूस लिएको पुष्टि भएको थियो ।

पत्रकार गुरुवाचार्य रहेनन्

काठमाडौं, ६ मंसिर– वरिष्ठ पत्रकार विनय गुरुवाचार्यको शुक्रबार बिहान निधन भएको छ।लामो समयदेखि पार्किन्सनसम्बन्धी समस्याबाट पीडित ८२ वर्षीय गुरुवाचार्यको थापाथलीस्थित आफ्नै निवासमा निधन भएको हो।

गुरुवाचार्यले अमेरिकामा मुख्यालय रहेको अन्तर्राष्ट्रिय समाचार समिति एसोसिएटेड प्रेस (एपी) को काठमाडौंस्थित प्रतिनिधिका रूपमा ३८ वर्ष काम गरेका थिए । उनको शनिबार अन्त्येष्टि हुने परिवारले जनाएको छ । गुरुवाचार्यका श्रीमती, एक छोरा र एक छोरी छन् ।

उपनिर्वाचनको अनुगमन गर्न आग्रह

काठमाडौं, ६ मंसिर– निर्वाचन आयोगले मंसिर १४ गते हुने उपनिर्वाचनको अवलोकन गर्न नेपालस्थित कूटनीतिक नियोग, संयुक्त राष्ट्रसंघीय विकास कार्यक्रमसहितका अन्तर्राष्ट्रिय समुदायका प्रतिनिधि र विकास साझेदारलाई आग्रह गरेको छ ।
प्रमुख निर्वाचन आयुक्त दिनेशकुमार थपलियाले बिहीबार अन्तर्राष्ट्रिय समुदायका प्रतिनिधिहरूलाई आयोगको कार्यालयमा सम्बोधन गर्दै उपनिर्वाचनको अनुगमन गर्न आह्वान गरेका हुन् । उनले उपनिर्वाचन स्वच्छ, स्वतन्त्र, निष्पक्ष, कम खर्चिलो र भयरहित वातावरणमा हुने बताए । उनले निर्वाचनको तयारी पूरा भइसकेको जानकारी गराए ।

नेकपाबाट आचारसंहिता उल्लंघन : कांग्रेस

काठमाडौं, ६ मंसिर– कांग्रेसले सत्तारूढ नेकपाले उपनिर्वाचन आचारसंहिताविरोधी क्रियाकलाप गरिरहेको आरोप लगाउँदै त्यसलाई रोक्न निर्वाचन आयोगलाई आग्रह गरेको छ । कांग्रेसको अनुगमन तथा निर्वाचन आयोग समन्वय समितिले बिहीबार विज्ञप्ति जारी गरी नेकपा र सार्वजनिक पदमा रहेका जनप्रतिनिधिहरूले नयाँ कार्यक्रम र बजेट दिने घोषणा गरी मतदातालाई प्रभावित पार्नेलगायतका क्रियाकलाप गरिरहेको आरोप लगाएको हो । 

‘उपनिर्वाचन हुने स्थानहरूमा सरकार र सोसम्बद्ध दलका सार्वजनिक पद धारण गरेका व्यक्ति प्रचारप्रसारमा लाग्ने, नया“ योजना, कार्यक्रम र बजेट दिने, अवाञ्छित क्रियाकलाप गरी मतदातालाई प्रभावित पार्नेलगायतका क्रियाकलाप भइरहेका छन्,’ कांग्रेसको विज्ञप्तिमा छ, ‘यस्ता कार्यको हामी घोर भत्र्सना र आचारसंहिताविपरीतका गतिविधि भविष्यमा नदोहो¥याउन सचेत गराउँछौं ।’

नवनियुक्त मन्त्री र राज्यमन्त्रीले लिए शपथ

काठमाडौं, ६ मंसिर– नवनियुक्त ६ मन्त्रीले बिहीबार बिहान शपथग्रहण गरेका छन् । शीतलनिवासमा आयोजित कार्यक्रममा राष्ट्रपति विद्यादेवी भण्डारीले उनीहरूलाई पद तथा गोपनीयताको शपथ गराएकी हुन् ।
शपथ लिएका मन्त्रीमा हृदयेश त्रिपाठी (संघीय मामिला तथा सामान्य प्रशासन), घनश्याम भुसाल (कृषि तथा पशुपन्छी विकास), लेखराज भट्ट (उद्योग, वाणिज्य तथा आपूर्ति), रामेश्वरराय यादव (श्रम, रोजगार तथा सामाजिक सुरक्षा), वसन्तकुमार नेम्बाङ (भौतिक पूर्वाधार तथा यातायात) र पार्वत गुरुङ (महिला, बालबालिका तथा ज्येष्ठ नागरिक) छन् ।
कार्यक्रममा नवनियुक्त तीन राज्यमन्त्रीले पनि शपथ लिए । प्रधानमन्त्री केपी ओलीले उनीहरूलाई पद तथा गोपनीयताको शपथ गराए । नवनियुक्त राज्यमन्त्रीमा मोतीलाल दुगड (उद्योग), नवराज रावत (स्वास्थ्य) र रामवीर मानन्धर (सहरी विकास) छन् ।

सीमा अतिक्रमण निरीक्षण गर्न समिति

चार बलात्कारपीडितलाई ५/५ लाख
काठमाडौं, ६ मंसिर– सरकारले भारत र चीनसँग विवादित सीमा क्षेत्रको स्थलगत निरीक्षण गर्न समिति गठन गरेको छ । मन्त्रिपरिषद् बैठकले मंगलबार नेपाल–भारत र नेपाल–चीन सीमा निरीक्षण गर्न छुट्टाछुट्टै समिति गठन गरेको सरकारका प्रवक्ता सञ्चार तथा सूचना प्रविधिमन्त्री गोकुल बाँस्कोटाले जानकारी दिए ।
सरकारले समितिमा रहेका अधिकारीहरूको नाम भने सार्वजनिक गरेको छैन । भारतले नेपालको लिपुलेक, कालापानी र लिम्पियाधुरा आफ्नोतर्फ पारेर हालै नक्सा सार्वजनिक गरेपछि सीमा विवादको विषयलाई कूटनीतिक पहलबाट समाधान गर्नुपर्ने आवाज उठ्दै आएको छ ।

दुई सचिवको सरुवा

काठमाडौं, ५ मंसिर– सरकारले प्रदेश २ का प्रमुख सचिव दीपक सुवेदीलाई सञ्चार तथा सूचना प्रविधि मन्त्रालयको सचिवमा सरुवा गरेको छ । सचिव महेन्द्र गुरुङले ५८ वर्ष उमेर पुगी दुई साताअघि अनिवार्य अवकाश पाएपछि सञ्चार मन्त्रालय प्रशासनिक नेतृत्वविहीन भएको थियो । 

प्रधानमन्त्री तथा मन्त्रिपरिषद् कार्यालयको अतिरिक्त समूहमा रहेका सचिव रामकृष्ण सुवेदीलाई भने प्रदेश २ को प्रमुख सचिवमा सरुवा गरिएको छ । मन्त्रिपरिषद्को मंगलबार बसेको बैठकले उनीहरूको सरुवा गरेको हो ।

प्रधानमन्त्रीको नयाँ निवास बनाइँदै

काठमाडौं, ५ मंसिर– सहरी विकास तथा भवन निर्माण विभागले बालुवाटारमा प्रधानमन्त्रीको नयाँ निवास निर्माण सुरु गरेको छ । पञ्चायतकालमा निर्मित पुरानो भवन भत्काई विभागले नयाँ बनाउन लागेको हो । भवनको लागत ३३ करोड ८० लाख रुपैयाँ छ । 

नयाँ भवन नबनेसम्म प्रधानमन्त्री केपी शर्मा ओली प्रधानमन्त्री निवासभित्र दक्षिणतर्फ रहेको अर्को भवनमा बस्ने विभाग स्रोतले जानकारी दिएको छ । निर्माण ठेक्का पाएको कन्टेक प्रालिले ०७८ भदौ ११ भित्र नयाँ भवन बनाइसक्ने विभागले जानकारी दिएको छ ।

न्यौपाने अध्यक्ष नियुक्त

काठमाडौं, ५ मंसिर– सरकारले तारा गाउँ विकास समितिको अध्यक्षमा प्रह्लाद न्यौपानलाई नियुक्त गरेको छ । संस्कृति, पर्यटन तथा नागरिक उड्डयन मन्त्रालयले मन्त्रीस्तरीय निर्णयबाट न्यौपानेलाई चार वर्षका लागि अध्यक्ष नियुक्त गरेको हो । 

समितिले मुलुकका चार ठाउँमा तारागाउँ रिसोर्ट होटल सञ्चालन गर्नुका साथै पर्यटन प्रवद्र्धनको काम गर्दै आएको छ ।

१९ लाख भ्रष्टाचार आरोपमा ३ जनाविरुद्ध मुद्दा

काठमाडौं, ५ मंसिर– अख्तियार दुरुपयोग अनुसन्धान आयोगले साल्ट ट्रेडिङ कर्पोरेसन लिमिटेडको कोसी अञ्चल कार्यालय, विराटनगरका तत्कालीन कार्यालय प्रमुख नवीनचन्द्र झासहित तीन जनाविरुद्ध बुधबार विशेष अदालतमा भ्रष्टाचार मुद्दा दायर गरेको छ । 

मुद्दा दायर गरिएकामा झाका अतिरिक्त भण्डारण शाखाका प्रमुख दिलचन्द्र राई र सहायक खगेन्द्र बस्नेत छन् । उनीहरूमाथि अञ्चल कार्यालयको गोदाममा रहेको रासायनिक मल बिक्रीको रेकर्ड नराखी १९ लाख ७ हजार रुपैयाँ हिनामिना गरेको आरोप छ । अख्तियारले नवलपरासीको जनता माध्यमिक विद्यालय सुक्रौलीका व्यवस्थापन समितिका तत्कालीन अध्यक्ष पूर्णवासी यादव (अहिर) र धनुषाको राष्ट्रिय प्राथमिक विद्यालयकी शिक्षक संगीताकुमारी महतोविरुद्ध समेत भ्रष्टाचार मुद्दा दर्ता गरेको छ ।

चिनियाँ लामामाथि छानबिन गर्न समिति

काठमाडौं, ३ मंसिर– बौद्ध स्तूप क्षेत्रको बौद्ध घ्याङ गुठीका चिनियाँ लामाका विषयमा उत्पन्न विवाद छानबिन गरी समस्या समाधानका लागि सुझाव दिन पाँच सदस्यीय समिति गठन गरिएको छ ।
संस्कृति, पर्यटन तथा नागरिक उड्डयन मन्त्रालयले सहसचिव रुद्रसिंह तामाङको संयोजकत्वमा छानबिन समिति गठन गरेको हो । समितिमा गृह, भूमि व्यवस्था, सहकारी तथा गरिबी निवारण मन्त्रालय, गुठी संस्थान र पुरातŒव विभागका प्रतिनिधि सदस्य छन् ।

त्रिविबाटै बन्यो नक्कली प्रमाणपत्र !

काठमाडौं, १ मंसिर– त्रिभुवन विश्वविद्यालय मातहतको परीक्षा नियन्त्रण कार्यालयबाटै मानविकी विषयमा स्नातक तहको नक्कली लब्धांकपत्र र चारित्रिक प्रमाणपत्र जारी भएको पाइएको छ ।
अख्तियार दुरुपयोग अनुसन्धान आयोगको छानबिनका क्रममा तत्कालीन परीक्षा प्रशासन महाशाखा प्रमुख वैकुण्ठप्रसाद थपलियाले नक्कली प्रमाणपत्र जारी गरेको खुलेको हो ।
अख्तियारका अनुसार थपलियाले गोरखापत्र संस्थानका तत्कालीन उपसम्पादक वासुदेव पोखरेललाई नक्कली प्रमाणपत्र बनाइदिएका हुन् । पोखरेल सोही प्रमाणपत्रका आधारमा गोरखापत्र संस्थानमा सेवा प्रवेश गर्नुका साथै बढुवासमेत भएका थिए ।

राष्ट्रपतिसमक्ष दुई आयोगका प्रतिवेदन पेस

काठमाडौं, १ मंसिर– राष्ट्रिय समावेशी आयोग र मधेसी आयोगले राष्ट्रपति विद्यादेवी भण्डारीसमक्ष आव ०७५÷७६ को वार्षिक प्रतिवेदन पेस गरेका छन् । 

शीतल निवासमा सोमबार आयोजित कार्यक्रममा मधेसी आयोगका अध्यक्ष डा. विजयकुमार दत्त र राष्ट्रिय समावेशी आयोगकी कार्यवाहक अध्यक्ष विष्णुमाया ओझाले आआफ्ना आयोगको प्रतिवेदन पेस गरेको राष्ट्रपति कार्यालयले जानकारी दिएको छ ।

आचारसंहिता पालना नगरे कारबाही

काठमाडौं, ३० कात्तिक– निर्वाचन आयोगले मंसिर १४ मा हुने उपनिर्वाचनका लागि जारी आचारसंहिताविपरीत काम गरेको पाइए कारबाही गर्ने चेतावनी दिएको छ । आयोगले आइतबार जारी गरेको विज्ञप्तिमा आचारसंहिता पूर्णरूपमा पालना गर्न÷गराउन तीनै तहका सरकारसहित सरोकारवाला सबैलाई आग्रह गरिएको छ ।

‘कसैले आचारसंहिताविपरीत काम गरेको पाइए प्रत्येक जिल्लामा उजुरीको सुनुवाइ तथा अनुगमनका लागि मुख्य निर्वाचन अधिकृतको संयोजकत्वमा रहेको आचारसंहिता अनुगमन समितिले कारबाही अघि बढाउनेछ’ विज्ञप्तिमा भनिएको छ ।

अतिक्रमणको विरोधमा दूतावासअगाडि प्रदर्शन

काठमाडौं, ३० कात्तिक– भारत सरकारद्वारा कालापानी, लिपुलेक र लिम्पियाधुरा लगायतको नेपाली भूमि अतिक्रमण गरिएको विरोधमा कांग्रेसको भ्रातृ संगठन नेविसंघले आइतबार लैनचौरस्थित भारतीय दूतावास अगाडि प्रदर्शन गरेको छ ।

प्रदर्शनमा हस्तक्षेप गरी प्रहरीले नेविसंघका नवराज त्रिपाठी, मनीष सिंखडा, दीपक ओझा, सरोज थापा, सन्तोष पाण्डे र दीपेश ओलीलगायतलाई पक्राउ गरेको थियो । सबैलाई साँझ छाडिदिएको छ ।

उनीहरूले कालापानी, लिपुलेक र लिम्पियाधुरा नेपाली भूमि हो भन्दै कालो ब्यानर र कालो बेलुन उडाएर प्रदर्शन गरेका थिए । भारतले नयाँ राजनीतिक नक्सामा आफ्नो भन्दै समावेश गरेको नेपाली भूमि फिर्ता गर्न नेविसंघले माग गरेको छ ।

साढे ३८ लाखसहित पक्राउ

काठमाडौं, ३० कात्तिक– स्रोत नखुलेको साढे ३८ लाख रुपैयाँसहित एकजना भारतीय नागरिकलाई प्रहरीले आइतबार पक्राउ गरेको छ । महानगरीय प्रहरी वृत्त कालिमाटीले भारत बेतिया, जोगपट्टी थानाका सत्यनारायण प्रसादलाई पक्राउ गरेको हो । भारतीय नोट र हुन्डी कारोबार गर्ने गरेको सूचना पाएपछि वृत्तको टोलीले प्रसादलाई कुलेश्वरस्थित डेराबाटै उक्त रकमसहित नियन्त्रणमा लिएको हो ।
प्रसादबाट ३७ लाख ५ हजार रुपैयाँ बराबरका ६ थान चेक, १ लाख १९ हजार भारु, विभिन्न बैंकका ६ थान चेकबुक र मोबाइल बरामद भएको प्रहरीले जनाएको छ । थप छानबिन गरी कानुनी कारबाही गर्न प्रहरीले उनलाई राजस्व अनुसन्धान विभागको जिम्मा लगाउने भएको छ ।

घूस लेनदेनमा ५ पक्राउ, चार जनाविरुद्ध मुद्दा

काठमाडौं, २८ कात्तिक– अख्तियार दुरुपयोग अनुसन्धान आयोगले यातायात व्यवस्था कार्यालयं मोटरसाइकल काटमाठौंमा घूस लेनदेनमा संलग्न शाखा अधिकृतसहित ५ जनालाई पक्राउ गरेको छ ।
अख्तियारको टोलीले बुधबार यातायात कार्यालयमा छापा मारी मोटरसाइकल खरिदबिक्रीको रजिस्ट्रेसन पास गरिदिने क्रममा ३ हजार रुपैयाँका दरले घूस लेनदेन गरिरहेका बेला उनीहरूलाई पक्राउ गरेको हो । पक्राउ परेकामा यातायात कार्यालयका शाखा अधिकृत शुक्रप्रसाद भट्टराई, रिकन्डिसन हाउसका प्रतिनिधिहरू किरण देउला, उत्तमविक्रम शाही, रमेशकुमार केसी र सुरेश छुस्याकी छन् ।
रिकन्डिसन हाउसका प्रतिनिधिहरूमार्फत् मोटरसाइकल पास गर्न सहज गरिदिने भनी लेनदेन गरिरहेका बेला उनीहरू घूस रकमसहित पक्राउ गरिएको अख्तियारले जनाएको छ । उनीहरूलाई अख्तियारको हिरासतमा राखी छानबिन अगाडि बढाइएको छ ।

होर्डिङ बोर्ड हटाउन महानगरलाई सर्वोच्चको ताकेता

काठमाडौं, २८ कात्तिक– सर्वोच्च अदालतले होर्डिङ बोर्ड हटाउने आफ्नो पुरानो आदेश कार्यान्वयन गर्न काठमाडौं महानगरपालिकालाई एक साताको अल्टिमेटम दिएको छ । सर्वोच्चले ४ वर्षअघि काठमाडौं उपत्यकाभित्र होर्डिङ बोर्ड नराख्न र राखेको भए हटाउन परमादेश जारी गरेको थियो ।
परमादेशपछि पनि महानगरले होर्डिङ बोर्ड नहटाएको र अझै बढ्दै गएको पाइएपछि सर्वोच्च अदालतमातहतको फैसला कार्यान्वयन निर्देशनालयले पत्र पठाएर हटाउन ताकेता गरिएको हो । निर्देशनालयले पत्रमा महानगरलाई सात दिनभित्र होर्डिङ बोर्डहरू हटाउने काम सुरु गरी कार्यान्वयनको प्रगति विवरण पठाउनसमेत आग्रह गरेको छ ।

परामर्शदाता छान्नुअघि नै छनौट मापदण्ड सार्वजनिक

आयोजनाका तत्कालीन प्रमुखहरू खाँड र श्रेष्ठलाई सचेत गराइयो

काठमाडौं, २७ कात्तिक– राष्ट्रिय गौरवको काठमाडौं–निजगढं द्रुतमार्ग (फास्ट ट्रयाक) निर्माणका क्रममा परामर्शदाता छान्नुअगाडि नै ‘छनोटको मूल्यांकन मापदण्ड’ को मस्यौदा बाहिरिएको पाइएको छ ।
नेपाली सेनाको ‘कोर्ट अफ इन्क्वारी बोर्ड’ ले आयोजनाको सुपरिवेक्षणका लागि अन्तर्राष्ट्रियस्तरको परामर्शदाता छनोट गर्नुअघि नै मापदण्डको मस्यौदा चुहावट भएको ठहर गर्दै आयोजनाका तत्कालीन र वर्तमान पदाधिकारीलाई सचेत गराएको छ ।
अब आइन्दा त्यस्तो गल्ती नदोहो¥याउन चेतावनीस्वरूप सडक निर्माण आयोजनासँग सम्बन्धित तत्कालीन र वर्तमान सैनिक अधिकारीहरूलाई सचेत गराइएको जानकारी स्रोतले दिएको छ । स्रोतका अनुसार ‘कोर्ट अफ इन्क्वारी बोर्ड’ को छानबिन प्रतिवेदन आएपछि सैनिक सचिव विभागबाट द्रुतमार्ग सडक निर्माण आयोजनाका पूर्वप्रमुख प्राविधिक उपरथी योगेन्द्र खाँड, तत्कालीन प्रमुख सहायक रथी शरदलाल श्रेष्ठसहित प्राविधिक मूल्यांकन बोर्डका सबै सदस्यलाई सचेत गराइएको हो ।

इन्जिनियर र प्रधानाध्यापकविरुद्ध मुद्दा

काठमाडौं, २७ कात्तिक– अख्तियार दुरुपयोग अनुसन्धान आयोगले इन्जिनियर सन्तोषकुमार चौधरी र प्रधानाध्यापक नरबहादुर रावलविरुद्ध बुधबार विशेष अदालतमा भ्रष्टाचार मुद्दा दायर गरेको छ ।

कपिलवस्तुको महाराजगंज नगरपालिकाका इन्जिनियर चौधरीले इ–बिडिङसम्बन्धी तालिमको नक्कली प्रमाणपत्र र डोटीको श्री कफल कटेश्वर विद्यालयका प्रधानाध्यापक रावलले नक्कली शैक्षिक प्रमाणपत्र पेस गरी सेवा प्रवेश गरेको छानबिनबाट पुष्टि भएकाले उनीहरूविरुद्ध मुद्दा दायर गरिएको अख्तियारले जनाएको छ । मुद्दा दायर भएपछि दुवै जना सेवाबाट निलम्बित भएका छन् ।

अधिवक्ताको लाइसेन्स निलम्बन नगर्न अन्तरिम आदेश

काठमाडौंं, २६ कात्तिक– सर्वोच्च अदालतले कानून व्यवसायीको लाइसेन्स निलम्बन गर्ने नेपाल कानुन व्यवसायी परिषद्को निर्णय कार्यान्वयन नगर्न अन्तरिम आदेश जारी गरेको छ । न्यायाधीशद्वय ईश्वर खतिवडा र मनोज शर्माको इजलासले मंगलबार परिषदको निर्णय कार्यान्वयन नगर्न आदेश जारी गरेको हो । 

परिषदले अख्तियार दुरुपयोग अनुसन्धान आयोगबाट भ्रष्टाचारको मुद्दा लागेका आठ अधिवक्ता सुरेन्द्रप्रसाद कोइराला, ताराप्रकाश पौडेल, बाबुराम शर्मा रेग्मी, योगेन्द्र पोखरेल, हरि न्यौपाने, प्रेमसिंह धामी, जगदेव चौधरी र चन्द्रप्रसाद खनालको कानुन व्यवसायी प्रमाणपत्र (लाइसेन्स) निलम्बन गर्ने निर्णय गरेको थियो ।

दुई जनाविरुद्ध भ्रष्टाचार मुद्दा

काठमाडौं, २६ कात्तिक– अख्तियार दुरुपयोग अनुसन्धान आयोगले मालपोत कार्यालय, कास्कीका खरिदार प्रकाश पौडेल र लेखापढी व्यवसायी मनहरि भट्टराईविरुद्ध मंगलबार विशेष अदालतमा भ्रष्टाचार मुद्दा दायर गरेको छ ।
पौडेल र भट्टराईले सेवाग्राहीको जग्गा नामसारी गरिदिने क्रममा १२ हजार रुपैयाँ घूस लिएको छानबिनबाट पुष्टि भएकाले उनीहरूविरुद्ध मुद्दा दायर गरिएको अख्तियारले जनाएको छ । मुद्दा दायर भएसँगै पौडेल सेवाबाट निलम्बित भएका छन् ।

मालवाहक गाडी नचलाउन आग्रह

काठमाडौं, २५ कात्तिक– महानगरीय ट्राफिक प्रहरी महाशाखाले बंगलादेशका राष्ट्रपति अब्दुल हमिदको मंगलबारदेखि कात्तिक २९ सम्म हुने नेपाल भ्रमणको समयमा राजधानीको चक्रपथभित्र ठूला मालबाहक गाडी नचलाउन आग्रह गरेको छ ।

महाशाखाले सोमबार विज्ञप्ति जारी गरी भ्रमणका क्रममा सवारी व्यवस्थापनमा सहयोग गर्नसमेत उपत्यकाबासीलाई आग्रह गरेको छ । विज्ञप्तिमा महाशाखाले भ्रमणका क्रममा मुख्य सडकको प्रयोग नगरी अन्य वैकल्पिक सडकको प्रयोग गर्न तथा अनावश्यक सवारी साधन प्रयोग नगर्नसमेत आग्रह गरेको छ । पुराना र अवस्था ठीक नभएका गाडी नचलाउन तथा हर्नको प्रयोग नगर्नसमेत महाशाखाले भनेको छ ।

मेडिकल कलेजका सञ्चालकको सम्पत्ति छानबिन गर्न सिफारिस

सतर्कता केन्द्रको प्रतिवेदन
चार वर्षमा विद्यँर्थीबाट ३ अर्ब रुपैयाँ ठगिएको दाबी, त्रिवि र केयूका तत्कालीन र वर्तमान पदाधिकारीलाई समेत कारबाही गर्न सुझाव
काठमाडौं, २५ कात्तिक– राष्ट्रिय सतर्कता केन्द्रले १२ वटा निजी मेडिकल कलेजका सञ्चालक र तिनका नातेदारको सम्पत्ति छानबिन गर्न सम्पत्ति शुद्धीकरण अनुसन्धान विभागलाई सिफारिस गरेको छ । ती कलेज सञ्चालकले विद्यार्थी र अभिभावकबाट चार वर्षमा करिब ३ अर्ब रुपैयाँ ठगी गरेको केन्द्रको दाबी छ ।
प्रधानमन्त्री तथा मन्त्रिपरिषद् कार्यालय मातहतको केन्द्रले स्थलगत छानबिनपछि तयार पारेको प्रतिवेदन विभागलाई उपलब्ध गराएको छ । विद्यार्थी र अभिभावकलाई बिल भर्पाइसमेत नदिई कलेज सञ्चालकले कर छली गरेको र अर्बौं रुपैयाँ अवैध रूपमा आर्जन गरेकाले सम्पत्ति शुद्धीकरण ऐनअनुसार कारबाही गर्न सिफारिस गरिएको केन्द्रले जनाएको छ ।
केन्द्रका अनुसार त्रिभुवन विश्वविद्यालय र काठमाडौं विश्वविद्यालयबाट सम्बन्धन प्राप्त १७ कलेजमध्ये १२ वटाले तोकिएभन्दा थप २३ शीर्षकमा शुल्क उठाएका छन् । प्रतिविद्यार्थी वर्षैपिच्छे २ लाखदेखि २५ लाख ४० हजार ५ सय ३२ रुपैयाँसम्म अतिरिक्त शुल्क लिइएको छ । यसो गर्दा कलेजहरूले ४ वर्षमा २ अर्ब ८५ करोड १३ लाख १६ हजार २ सय ९७ रुपैयाँ ठगी गरेका छन् । विद्यार्थीहरूलाई परिचयपत्र, लाइबे्ररी कार्ड नदिने र परीक्षाबाट वञ्चित गर्ने धम्की दिई रकम असुलिएको केन्द्रले जनाएको छ । उक्त प्रतिवेदन प्रधानमन्त्री तथा मन्त्रिपरिषद् कार्यालय र शिक्षा मन्त्रालयलाई समेत बुझाइएको छ ।

इन्सेकको अध्यक्षमा श्रेष्ठ

काठमाडौं, २३ कात्तिक– अनौपचारिक क्षेत्र सेवा केन्द्र (इन्सेक) को अध्यक्षमा डा. इन्दिरा श्रेष्ठ निर्वाचित भएकी छन् । इन्सेकको २३ औं साधारणसभाले श्रेष्ठसहित सात सदस्यीय कार्यसमिति चयन गरेको छ । कार्यसमितिको सदस्यमा दीपकराज काफ्ले, नजिर मियाँ, गीता बराल, रुद्रबहादुर चर्मकार, रघुनाथ अधिकारी र शोभाकर बुढाथोकी चुनिएका छन् । नवनिर्वाचित अध्यक्ष श्रेष्ठले मानव अधिकार र सामाजिक न्यायका लागि इन्सेक अभियानलाई अझ सशक्त रूपमा अगाडि बढाउने प्रतिबद्धता व्यक्त गरिन् । 

साधारणसभाले ९ बुँदे घोषणापत्रसमेत सार्वजनिक गरेको छ । घोषणापत्रमा इन्सेकले विधिको शासन र मानव अधिकार रक्षा तथा विकासका लागि राजनीतिक दलका साथै राज्यका विभिन्न निकायस“ग सहकार्य गर्ने, संक्रमणकालीन न्यायको प्रक्रियालाई सक्दो छिटो र पीडितको न्यायको सुनिश्चिततासहित निष्कर्षमा पु¥याउन सशक्त भूमिका निर्वाह गर्ने उल्लेख गरेको छ ।

‘कोषमा योगदान गर्नेलाई करोडसम्म ऋण’

काठमाडौं, २३ कात्तिक– सरकारले सामाजिक सुरक्षा कोषमा योगदान (नियमित रकम जम्मा) गर्नेहरूलाई एक करोड रुपैया“सम्मको ऋण दिने तयारी थालेको छ । कर्मचारी सञ्चय कोष र नागरिक लगानी कोषले जस्तै सामाजिक सुरक्षा कोषमा योगदान गरेकाहरूलाई समेत घरजग्गा खरिद र निर्माण तथा शैक्षिक ऋण प्रदान गर्ने तयारी भइरहेको श्रम, रोजगार तथा सामाजिक सुरक्षामन्त्री गोकर्ण विष्टले जानकारी दिए । 

सिंहदरबारमा शनिबार गैरसरकारी संस्था महासंघ, उपभोक्ता महासंघ, कर्मचारी सञ्चय कोषलगायत पदाधिकारीस“गको छलफलमा उनले सामाजिक सुरक्षा कोषमा योगदान गर्नेहरूको मागलाई ध्यानमा राखेर घरजग्गा सापटी बढीमा १ करोड र शैक्षिक कर्जाबापत बढीमा ३५ लाख ऋण दिने कार्यविधिको मस्यौदा मन्त्रालयले तयार गरिरहेको बताए ।

देउवाद्वारा भारतीय राजदूतसित नयाँ नक्साबारे आपत्ति प्रकट

काठमाडौं, २१ कात्तिक– प्रमुख प्रतिपक्षी कांग्रेसका सभापति शेरबहादुर देउवाले भारतको नयाँ राजनीतिक नक्सामा नेपाली भूभाग कालापानी, लिम्पियाधुरा र लिपुलेकलाई समावेश गरिएकामा भारतीय सरकारसमक्ष आपत्ति जनाएका छन् ।
सभापति देउवाले बिहीबार नेपालका लागि भारतीय राजदुत मंजिवसिंह पुरीलाई फोन गरी कालापानी, लिम्पियाधुरा र लिपुलेक नेपालको अविभाज्य भूमि रहेको उल्लेख गर्दै भारतीय अतिक्रमणप्रति आपत्ति जनाएका हुन् ।
कांग्रेस प्रवक्ता विश्वप्रकाश शर्माद्वारा जारी विज्ञप्तिमा देउवाले ‘भारतको नयाँ नक्साबारेमा बिहीबार भारतीय राजदुत पुरीसँग टेलिफोन संवाद गरेको र कालापानी तथा लिपुलेक नेपालको अविभाज्य भूमि रहेकोे तथ्य स्मरण गराएको’ उल्लेख छ ।

इन्स्पेक्टरसहित ५ जनाविरुद्ध मुद्दा

काठमाडौं, २० कात्तिक– अख्तियार दुरुपयोग अनुसन्धान आयोगले सशस्त्र प्रहरी बलका इन्स्पेक्टरसहित ५ जनाविरुद्ध बुधबार विशेष अदालतमा भ्रष्टाचार मुद्दा दायर गरेको छ ।
अख्तियारले घूस लिएको आरोपमा सशस्त्र प्रहरी बल, भजनी कैलालीका सशस्त्र प्रहरी निरीक्षक रवीन्द्र कार्की, हवल्दार ज्ञानबहादुर चौधरी र जवान रतिराम चौधरीविरुद्ध मुद्दा दायर गरेको छ ।
भन्सार तिरी भारतीय मालसामान ल्याएका सेवाग्राहीसँग २० हजार रुपैयाँ घूस लिई भ्रष्टाचार गरेको पुष्टि भएकाले कार्कीसहित तीन जनाविरुद्ध मुद्दा दायर गरिएको अख्तियारले जनाएको छ ।
अख्तियारले घरायसी सामान ओसारपसारमा सहजीकरण गरिदिने नाममा सेवाग्राहीसँग ७ हजार रुपैयाँ घुस लिएको आरोपमा सशस्त्र प्रहरी बल बेसक्याम्प सेमरी नवलपरासीका हवल्दार ज्ञानेन्द्रकुमार मौर्यविरुद्ध समेत बुधबार नै मुद्दा दायर गरेको छ ।

‘पूर्वस्वीकृतिबिना कामदारसित रकम नअसुल’

काठमाडौं, १९ कात्तिक– वैदेशिक रोजगार विभागले मलेसियामा रोजगारीका लागि पठाउने नाममा पूर्वस्वीकृतिलगायत प्रक्रिया पूरा नगरी स्वास्थ्य परीक्षण तथा ‘इमिग्रेसन सेक्युरिटी क्लियरेन्स’ का नाममा कामदारसँग रकम नअसुल्न निर्देशन दिएको छ ।
श्रम कार्यालय ताहाचलबाट हालसम्म करिब १ हजार ८ सय जनाले मात्र पूर्वस्वीकृति लिएको तर मलेसिया पठाउने नाममा झन्डै एक लाखभन्दा बढी कामदारबाट अवैध रूपमा स्वास्थ्य परीक्षण तथा इमिग्रेसन सेक्युरिटी क्लियरेन्सका नाममा रकम असुल भइरहेको पाइएको उल्लेख गर्दै विभागले त्यसरी रकम असुल नगर्न निर्देशन दिएको हो ।
विभागले मंगलबार सार्वजनिक सूचना जारी गरी वैदेशिक रोजगारीसँग सम्बन्धित प्रक्रिया पूरा नगरी विभिन्न बहानामा शुल्क लिनु अनुचित भएको बताएको छ । कुनै पनि व्यक्ति तथा संस्थालाई अनुचित कार्य नगर्न÷नगराउनसमेत सचेत गराएको छ ।

५ लाख घूस लिनेविरुद्ध भ्रष्टाचार मुद्दा

काठमाडौं, १८ कात्तिक– टोखा नगरपालिकाका इन्जिनियर दिनेशकुमार पाठकसहित तीन जनाविरुद्ध अख्तियार दुरुपयोग अनुसन्धान आयोगले सोमबार विशेष अदालतमा भ्रष्टाचार मुद्दा दायर गरेको छ । पाठकसँगै लायन्स इन्जिनियरिङ कन्स्ट्रक्सन एन्ड कन्सल्टेन्सी प्रालिका ओभरसियर प्रशान्त चौधरी र लेखापढी व्यवसायी जयराम तिमिल्सिनाविरुद्ध पनि मुद्दा दायर गरिएको हो । 

तीनैजनाले मिलेमतो गरी टोखा नगरपालिकाबाट घर निर्माण सम्पन्नको प्रमाणपत्र दिने क्रममा सेवाग्राहीसँग ५ लाख रुपैयाँ घूस लिई भ्रष्टाचार गरेको पुष्टि भएकाले मुद्दा दायर गरिएको आयोगले जनाएको छ । अभियोगपत्रमा तीनै जनालाई ५/५ लाख रुपैयाँ बिगो कायम गरी डेढ वर्ष कैद सजाय र जरिवाना गर्न मागदाबी गरिएको छ ।

महरा पुर्पक्षका लागि थुनामा

• सदरखोर डिल्लीबजारमा, जेलमा महरा पूर्वआईजीपी ठकुरीसँगै
• मुद्दाको टुंगो नलागेसम्म जेलमै रहने
• तत्काल प्राप्त प्रमाण हेर्दा थुनामै राखेर पुर्पक्षका लागि थुनामा राख्नु पर्ने देखियो : अदालत

काठमाडौं, १८ कात्तिक– जिल्ला अदालत काठमाडौंले बलात्कार प्रयासको कसुरमा पूर्व सभामुख कृष्णबहादुर महरालाई सोमबार पुर्पक्षका लागि थुनामा पठाएको छ । जिल्ला न्यायाधीश सुदर्शनराज पाण्डेको इजलासले आइतबारदेखि सुरु थुनछेक बहस सोमबार सकिएपछि महरालाई थुनामै राखेर मुद्दा अघि बढाउने आदेश दिएको हो ।
जिल्ला अदालतले संसद् सचिवालयकी कर्मचारीलाई बलात्कार प्रयास गरेको र प्रतिकार गर्दा हातपात गरेको अभियोग लागेका महरालाई पुर्पक्षका लागि थुनामा राखेर मुद्दा चलाउन आदेश दि“दै सदरखोर डिल्लीबजार (कारागार) मा राख्न आदेश गरेको हो । पाण्डेको इजलासले घटना विवरण, कागजात, जाहेरी दरखास्त, मौकामा कागज गर्नेहरूको बयान र तत्काल प्राप्त प्रमाणका आधारमा महरा कसुरदार होइन भन्न नसकिने भएकाले उनलाई पुर्पक्षका लागि थुनामा पठाउने आदेश गरेको जानकारी अदालत स्रोतले दिएको छ ।

आजदेखि नेपाल–यूएईबीच संयुक्त कार्यसमूह बैठक

काठमाडौं, १६ कात्तिक– नेपाल र संयुक्त अरब इमिरेट्स (यूएई) बीच भएको श्रम समझदारी (एमओयू) को कार्यान्वयन गर्न दुवै मुलुकका प्रतिनिधि सम्मिलित संयुक्त कार्य समूह (जेडब्लूसी) को पहिलो बैठक आइतबारदेखि काठमाडौंमा सुरु हु“दैछ ।
दुई दिनसम्म चल्ने बैठकले श्रम समझदारीको प्रभावकारी कार्यान्वयन, कामदारको भर्ना, रोजगारी र फिर्तासम्बन्धी विषयमा लाग्ने आइटमगत लागत निर्धारण गर्नेलगायतका प्राविधिक विषय टुंग्याउने जानकारी श्रम, रोजगार तथा सामाजिक सुरक्षा मन्त्रालयले दिएको छ ।
मन्त्रालयका अनुसार बैठक श्रम समझदारीलाई कार्यान्वयन गर्न आवश्यक प्राविधिक विषयलाई अन्तिम रूप दिई मोडालिटी टुंगो लगाउनेछ । बैठकले प्राविधिक विषय टुंगो लगाएपछि नया“ श्रम समझदारीअनुसार नेपाली श्रमिकले सेवा सुविधा प्राप्त गर्न थाल्ने छन् ।

कांग्रेसमा उम्मेदवारको टुंगो आइतबार

काठमाडौं, १५ कात्तिक– कांग्रेसले आगामी मंसिर १४ गते हुने उपनिर्वाचनका लागि आइतबार उम्मेदवार टुंगो लगाउने भएको छ ।
बिहीबार कांग्रेस सभापति शेरबहादुर देउवा निवास बुढानिलकण्ठमा बसेको पदाधिकारी बैठकले कास्कीको प्रतिनिधिसभा, दाङ, बागलुङ र भक्तपुरको प्रदेशसभा उम्मेदवार घोषणा १७ गते गर्ने निर्णय गरेको जानकारी प्रवक्ता विश्वप्रकाश शर्माले दिए ।
बिहीबारको बैठकमा जागरण अभियानको दुवै चरणमा खटिएका केन्द्रीय प्रतिनिधिहरुसहित पार्टी पदाधिकारी बैठक बसेको थियो । ‘जित्ने उम्मेदवार खोज्नु सामान्य नै हो तर यसपटक विगतको जस्तो हतारमा उम्मेदवार चयन गरिं“दैन । लामो गृहकार्य गरेर परामर्शपछि सर्वसम्मत हुने गरी उम्मेदवार चयन गरिन्छ,’ प्रवक्ता विश्वप्रकाश शर्माले भने ।

सामाजिक सुरक्षा कोषमा दर्ता हुन एक महिनाको समय थप

काठमाडौं, १५ कात्तिक– श्रम रोजगार तथा सामाजिक सुरक्षा मन्त्रालयले सम्पूर्ण रोजगारदाता कम्पनी र योगदानकर्तालाई सामाजिक सुरक्षा कोषमा सूचीकरण (दर्ता) हुन थप एक महिनाको समयसीमा तोकेको छ । मन्त्रालयले बिहीबार सूचना प्रकाशित गरी एक महिनाभित्र कोषमा सूचीकरण नभए कानुनबमोजिम कारबाही गर्ने चेतावनीसमेत दिएको छ ।
‘यो सूचना प्रकाशित भएको मितिबाट एक महिनाभित्र सम्पूर्ण रोजगारदाता र योगदानकर्तालाई अनिवार्य रूपमा कोषमा आवद्ध हुन जानकारी गराइन्छ’ सूचनामा भनिएको छ– ‘अन्यथा कानुनबमोजिम कारवाही हुनेछ ।’
सरकारले यसअघि असोजभित्र निजी क्षेत्रका सबै औद्योगिक प्रतिष्ठान र रोजगारदाताहरूलाई  कोषमा सूचीकरण हुन आह्वान गरेको थियो।अपेक्षाकृत रूपमा औद्योगिक प्रतिष्ठान र रोजगारदाता कम्पनीहरू कोषमा सूचीकरण हुन नआएपछि मन्त्रालयले थप एक महिनाको समय दिएको जानकारी मन्त्रालयका अधिकारीले दिए ।

आचारसंहिता पालना गर्ने दलहरूको प्रतिबद्धता

काठमाडौं, १५ कात्तिक– प्रमुख राजनीतिक दलले मंसिर १४ गते हुने उपनिर्वाचनमा निर्वाचन आचार संहिता पालना गर्ने प्रतिवद्धता जनाएका छन् ।
बिहीबार निर्वाचन आयोगले बोलाएको बैठकमा विभिन्न १७ दलका प्रतिनिधिले मन, वचन र कर्मले निर्वाचन आचारसंहिता पालना गर्ने प्रतिवद्धता जनाएका हुन् ।
प्रतिनिधिसभा, प्रदेशसभा र स्थानीय तहका विभिन्न पदमा हुने उपनिर्वाचनको समयमा आचार संहिता पालनाको विषयमा छलफल गर्न आयोगले सरकार र विभिन्न राजनीतिक दलका प्रतिनिधिलाई बोलाएको निर्वाचन आयुक्त ईश्वरीप्रसाद पौडेलले बताए ।