काठमाडौं, १७ वैशाख– संघीय मामिला तथा सामान्य प्रशासन मन्त्रालयले लामो समयदेखि हाजिर गर्नसमेत नपाएर अलपत्र परेका स्थानीय तहका सयभन्दा बढी कर्मचारीलाई कामकाजमा खटाएको छ । अलपत्र पर्नेमा शाखा अधिकृतदेखि चौथो तहसम्म्का कर्मचारी थिए ।
लोकसेवाबाट सिफारिस भएको छ महिनाभन्दा बढी समयदेखि उनीहरूले तलबसमेत पाएका थिएनन् । सरकारले कामकाजमा खटाएसँगै उनीहरूले तलबभत्ता पाउने भएका छन् ।
संघीय मामिलाले मंगलबार विज्ञप्ति जारी गरी लोकसेवा आयोगबाट सिफारिस भएका, तर तोकिएको स्थानीय तहमा हाजिर नगराइएका कारण समस्यामा परेका कर्मचारीहरूलाई तत्कालका लागि कामकाज गर्न खटाइएको जनाएको छ ।
स्थानीय तहहरूले यसअघि नै पदपूर्ति भइसकेको, बजेट नभएको, आफूले मागै नगरेको, अन्यत्रैबाट समायोजना भइसकेको आदि कारण दिएर लोकसेवाबाट आफ्नो पालिकामा सिफारिस भएका कर्मचारीलाई हाजिर गराएका थिएनन् ।
तोकिएको स्थानीय तहमा हाजिर हुन नपाएपछि तलबसमेत नपाएर अलपत्र कर्मचारीहरूले आफूलाई कामकाजमा लगाउन माग गर्दै संघीय मामिला मन्त्रालयमा धर्ना दिंदै आएका थिए ।
संघीय मामिला मन्त्रालयले सचिवस्तरीय निर्णयबाट दुईपटकमा गरी अलपत्र १ सय ६ कर्मचारीलाई पद रिक्त भएको अर्को स्थानीय तहमा कामकाजमा खटाएको हो ।
ती कर्मचारीलाई पद रिक्त भएपछि सिफारिस भएकै स्थानीय तह या अहिले कामकाजमा खटाइएकै ठाउँमा स्थायी व्यवस्थापन गरिने जानकारीसमेत मन्त्रालयले दिएको छ ।
No comments:
Post a Comment