दुई शिक्षकसहित तीनविरुद्ध मुद्दा

मुद्दा दायर भएसँगै तीनै जना पदबाट निलम्बित

काठमाडौं, १२ वैसाख– अख्तियार दुरुपयोग अनुसन्धान आयोगले दुई शिक्षकसहित तीन जनाविरुद्ध विशेष अदालतमा सोमबार भ्रष्टाचार मुद्दा दायर गरेको छ । नेपाल जनता प्रावि, नवलपरासीका प्रधानाध्यापक अर्जुनप्रसाद यादव र महावीर मावि ब्रह्मापुरी, कलैया, बाराका प्रा.वि. राहत शिक्षक कृति थापा खडकाविरुद्ध अख्तियारले मुद्दा दायर गरेको हो । उनीहरू नक्कली शैक्षिक प्रमाणपत्रका आधारमा सेवामा रहेको पुष्टि भएकाले मुद्दा दायर गरिएको अख्तियारले जनाएको छ ।

आन्तरिक राजस्व कार्यालय जगाती, भक्तपुरका नायब सुब्बा सविन सुवेदीविरुद्ध पनि मुद्दा दायर भएको छ । उनले स्वास्थ्यचौकी भवन निर्माण सम्पन्न भएपछि धरौटी रकम फिर्ता लिन कर समायोजन पत्र बनाउने प्रयोजनका लागि सेवाग्राहीसँग १५ हजार रुपैयाँ घूस लिएकाले मुद्दा दायर गरिएको अख्तियारले जनाएको छ । मुद्दा दायर भएसँगै तीनै जना पदबाट निलम्बित भएका छन् ।