काठमाडौं, २३ फागुन– प्रतिनिधिसभाको महिला तथा सामाजिक समितिले सुदूर पश्चिममा प्रचलित छाउपडी प्रथाले वर्षेनि सयौं महिला पीडित हुनु परेको उल्लेख गर्दै त्यसलाई दुई महिनाभित्र निमूल गर्न सरकारलाई निर्देशन दिएको छ ।
समितिको बिहीबार बसेको बैठकले बैठकले सुदूरपश्चिममा प्रचलित छाउपडी प्रथालाई निर्मूल गर्न तत्काल स्थानीय तहसँग सहकार्य गरी दुई महिनाभित्र परिणाम आउने गरी काम गर्न गराउन मन्त्रालय र सम्बद्ध निकायलाई निर्देशन दिएको हो ।
समितिले सुदूरपश्चिमको छाउपडी सम्बन्धमा समितिबाट भएको स्थलगत अध्ययन भ्रमण प्रतिवेदन प्रभावकारी कार्यान्वयन गर्न, गराउन र त्यसबारे कार्यप्रगति मासिक रूपमा उपलब्ध गराउन मन्त्रालय र सम्बद्ध निकायलाई आग्रह गरेको छ ।
समितिले छाउपडीसहितका कुरीति, कुप्रथा तथा कुसंस्कार निर्मूल गर्न महिला, बालबालिका तथा ज्येष्ठ नागरिक मन्त्रालयलाई पाँच बुँदे निर्देशन दिएको छ ।
बैठकमा महिला, बालबालिका तथा ज्येष्ठ नागरिकमन्त्री थममाया थापा र मन्त्रालयका निमित्त सचिव वीरबहादुर राईसमेत सहभागी थिए । समितिले विद्यमान कुरीति, कुप्रथा, कुसंस्कारको विस्तृत अध्ययन गरी सूची तयार गर्न तथा न्यूनीकरणका लागि स्पष्ट कार्यदिशा एवं रणनीति बनाई कार्यान्वयन गर्न गराउन मन्त्रालय र सम्बद्ध निकायलाई निर्देश गरेको छ ।
बैठकले आगामी वर्षलाई कुरीति, कुप्रथा तथा कुसंस्कारविरुद्धको वर्षका रूपमा मनाउन सकिने वा नसकिने सम्बन्धमा मन्त्रालयलाई एक साताभित्र समितिलाई जानकारी गराउनसमेत निर्देशन दिएको छ । बैठकमा मन्त्री थापाले समितिले दिएको निर्देशन अनुसार मुलुकमा विद्यमान कुरीति, कुप्रथा, कुसंस्कार न्यूनीकरणका लागि काम गर्ने र योजना बनाएर स्थानीय तहसँग मिलेर कार्यक्रम सञ्चालन गर्ने प्रतिबद्धता व्यक्त गरिन् ।
No comments:
Post a Comment