काठमाडौं, १६ भदौ– बहुक्षेत्रीय प्राविधिक तथा आर्थिक सहयोगका लागि बंगाल खाडीको प्रयास (बिम्स्टेक) सदस्य राष्ट्रहरूको संयुक्त सैन्य अभ्यास भदौ २५ देखि ३१ सम्म भारतको पुनामा हुने भएको छ ।
उक्त संयुक्त अभ्यासमा प्रत्येक मुलुकका ३०÷३० जना सैनिकको सहभागिता रहने जानकारी नेपाली सेनाले दिएको छ ।
नेपाली सेनाको जनसम्पर्क निर्देशनालयले दिएको जानकारीअनुसार बिमस्टेक सदस्य राष्ट्रका सैनिकहरूको पहिलो पटक हुने संयुक्त अभ्यास प्रतिआतंकवाद र विपद व्यवस्थापन विषयमा केन्द्रित रहने छ ।
यस्ता अभ्यासले एक–अर्का मुलुकका सेनाबीच घुलमिल हुन, क्षमता बुझ्न, अनुभव आदानप्रदान गर्न, विपदो समयमा मिलेर खोजतलास, उद्धार र राहतको जिम्मेवारी पूरा गर्न तथा अरू सहयोग आदानप्रदान गर्न सजिलो हुने विश्वास निर्देशनालयले व्यक्त गरेको छ ।
उक्त अभ्यासको निरीक्षण सदस्य राष्ट्रका सेना प्रमुखहरूसमेत पुना पुग्ने कार्यक्रमसमेत छ । पछिल्ला समयमा विपद् व्यवस्थापन र प्रतिआतंकवादका विषयमा केन्द्रित रहेर विभिन्न देशका सैनिकसित नेपाली सेनाले संयुक्त अभ्यास गर्ने गरेको छ ।
No comments:
Post a Comment