बचतमा अब अधिकतम ब्याज १० प्रतिशतमात्र
काठमाडौं, १७ साउन– सरकारले मुलुकभरका सहकारी संस्थाहरूले १६ प्रतिशतभन्दा बढी ब्याज लिन नपाउने व्यवस्था गरेको छ । मुलुकभर सहकारी संस्थाहरूले आफूखुसी जथाभावी बढी ब्याज लिंदै आएका थिए । त्यसलाई अंकुश लगाउन सरकारले सहकारी संस्थाहरूले लिन पाउने ब्याजदर १६ प्रतिशतभन्दा बढी गर्न नपाइने सीमा तोकेको हो । अब सहकारी संस्थाले बचतमा अधिकतम १० प्रतिशतभन्दा बढी ब्याज दिन नपाउने भएका छन् ।
भूमि व्यवस्था, सहकारी तथा गरिवी निवारण मन्त्रालय अन्तर्गतको सहकारी विभागले सहकारी संंस्थाहरूले कर्जामा १६ प्रतिशतभन्दा बढी ब्याज लिन नपाउने गरी ब्याजदरको सीमा तोेकेको हो । सहकारी विभाग सहकारी संस्थाहरूको नियमनकारी निकाय हो ।
विभागका रजिष्ट्रार टोकराज पाण्डेले बैंक तथा वित्तीय संस्थाहरूको ब्याजलाई मुख्य आधार बनाएर सहकारी संस्थाहरूको कर्जाको ब्याजदर अधिकत १६ प्रतिशतमात्र कायम गर्ने निर्णय गरिएको जानकारी दिए । उनका अनुसार व्याजदर निर्धारण समितिको सिफारिसमा विभागले ब्याजको सीमा तोकेको हो ।
विभागद्वारा शुक्रबार राजधानीमा आयोजित पत्रकार सम्मेलन उनले समितिको सिफारिसमा साउन १९ देखि लागू हुने गरी सहकारी संस्थाको बचत र ऋणको ब्याजदर अन्तर ६ प्रतिशतभन्दा घटी रहने व्यवस्था गरिएको जानकारीसमेत दिए ।
नया“ निर्णयअनुसार कर्जामा १६ प्रतिशत ब्याज लिने सहकारी संस्थाले अब बचतमा १० प्रतिशत या सोभन्दा कममात्र ब्याज दिन पाउने छन् । सरकारले सहकारी संस्थाहरुको व्याजदर निर्धारणका लागि रजिष्ट्रार पाण्डेको संयोजकत्वमा १० सदस्यीय समिति गठन गरेको थियो । विभागले सहकारी क्षेत्रभित्र सुशासन कायम गर्न आवश्यक कार्यविधि र निर्देशिका निर्माणको कार्य भइरहेको जानकारीसमेत पाण्डेले दिए ।
No comments:
Post a Comment