राँगाको आक्रमणमा परेका नासु श्रेष्ठको मृत्यु

काठमाडौं, १४ फागुन– राँगाको आक्रमणमा परी घाइते भएका नायव सुब्बा कान्छा श्रेष्ठको उपचारको क्रममा मंगलबार मृत्यु भएको छ ।

चन्द्रागिरि नगरपालिका–५ महाँदेवस्थानका ५२ वर्षीय श्रेष्ठ शनिबार चन्द्रागिरि–९ मच्छेगाउँमा राँगाको आक्रमणबाट सख्त घाइते भएका थिए । उनलाई उपचारका लागि त्रिपुरेश्वरस्थित ब्लूक्रस अस्पतालमा भर्ना गरिएको थियो । श्रेष्ठको मंगलबार नै अन्त्येष्टि गरिएको छ ।

राँगाको आक्रमणबाट घाइते भएका चन्द्रागिरि नगरपालिका–४ त्रिभुवन पार्ककी ४५ वर्षीया देवी राना र वडा–९ का ८० वर्षीय काजी महर्जन भने डिस्चार्ज भइसकेका छन् ।

राँगाको आक्रमणमा प्रहरी हवल्दारसहित ६ जना घाइते भएका थिए । राँगाको आक्रमणमा परी ७० वर्षीय मानवीर महर्जनको शनिबार नै मृत्यु भएको थियो । राँगोलाई प्रहरीले दहचोकमा शनिबार नै गोली हानेर मारिसकेको छ ।