घर जाँदाजाँदै सहसचिव पाण्डेको सचिवमा बढुवा

काठमाडौं, २८ भदौ- सरकारले लोकसेवा आयोगका सहसचिव अनिल पाण्डेलाई सचिवमा बढुवा गरेको छ । सहसचिव भएको १५ वर्ष पुगेका पाण्डेलाई मन्त्रिपरिषदले निजामती ऐनअनुसार सचिवमा बढुवा गरेको । निजामती ऐनको सहसचिवमा १५ वर्ष सेवा गरिसकेको व्यक्तिलाई विशिष्ट श्रेणीमा बढुवा गरी सचिवको पेन्सन र सम्मान दिने व्यवस्थाबमोजिम पाण्डेको पदोन्नति गरिएको हो ।
निजामती ऐनमा सहसचिवमा १५ वर्ष सेवा गरिसकेका सहसचिवलाई ५८ वर्ष उमेर पुगी अनिवार्य अवकास पाउनु एक महिनाअघि सरकारले सचिवमा बढुवा गर्ने व्यवस्था छ । पाण्डेले ५८ वर्ष पूरा गरी आगामी असोज ३ मा अनिवार्य अवकास पाउँदैछन् । अरु स्वतः बढुवाका कर्मचारीले जस्तै पाण्डेले पनि अनिवार्य अवकास नपाएसम्म लोकसेवामा सहसचिव हुँदा गर्दै आएको दायित्व नै निर्वाह गर्नेछन् ।