एक जनालाई भ्रष्टाचार मुद्दा, अर्को घुससहित पक्राउ

काठमाडौं, ४ माघ– अख्तियार दुरुपयोग अनुसन्धान आयोगले इलाका प्रशासन कार्यालय, सिमरा, बाराका कम्प्युटर अपरेटर राज्यनारायण साहविरुद्ध शुक्रबार विशेष अदालतमा भ्रष्टाचार मुद्दा दायर गरेको छ । नागरिकता प्रमाणपत्र बनाइदिने प्रयोजनका लागि सेवाग्राहीसँग लिएको घुससहित पक्राउ परेका साहविरुद्ध मुद्दा दायर गरिएको अख्तियारले जनाएको छ ।
यसैगरी अख्तियारले सव डिभिजन वन कार्यालय भजनी कैलालीका फरेस्टर हरिशचन्द्र कुमारलाई घुस रकमसहित पक्राउ गरेको छ । सामुदायिक बनबाट उपभोक्ताहरूलाई झिझा दाउरा उपलब्ध गराउन सहज वातावरण मिलाइदिने बहानामा सेवाग्राहीस“ग लिएको १० हजार रुपैयाँ घुससहित शुक्रबार पक्राउ गरिएको अख्तियारले जनाएको छ । दुवै जना निलम्बनमा परेकोसमेत अख्तियारले जनाएको छ ।