पत्रकार कुलुङको निधन

काठमाडौं, २२ पुस– पत्रकार मकरध्वज (एमडी) कुलुङ राईको ४८ वर्षको उमेरमा आइतबार बिहान निधन भएको छ । राजधानी दैनिकका वरिष्ठ उपसम्पादक राईको राजधानीको चावहिलस्थित हेल्पिङ ह्यान्डसमा उपचारका क्रममा निधन भएको हो ।
उच्च रक्तचाप र मधुमेहबाट पीडित राईलाई ज्वरोले च्यापेपछि शनिबार उपचारका लागि अस्पताल भर्ना गरिएको थियो । निमोनियाका कारण उनको मृत्यु भएको जानकारी अस्पताल स्रोतले दिएको छ । उनी संखुवासभाको मकालु गाउँपालिका, बालुङमा जन्मेका हुन् । उनी शिक्षा पत्रकार समूहका कोषाध्यक्षसमेत भएका थिए । उनका श्रीमती र एक छोरा छन् । उनको कुलुङ संस्कृतिअनुसार सोमबार अन्त्येष्टि गरिने जानकारी पारिवारिक स्रोतले जनाएको छ ।