काठमाडौं, १६ माघ– राष्ट्रिय जनता पार्टी (राजपा)ले राष्ट्रियसभाबाट अनसनरत डा. गोविन्द केसीका माग सम्बोधन गर्न राष्ट्रिय चिकित्सा शिक्षा विधेयकमाथि बुधबार संशोधन प्रस्ताव हालेको छ ।
प्रतिनिधिसभाबाट पारित भएर राष्ट्रिय सभामा पुगेको विधेयकमाथि राजपाका सांसद वृषेशचन्द्र लालले संशोधन प्रस्ताव दर्ता गरेका हुन् ।
विधेयकमाथि राष्ट्रियसभामा संशोधन दर्ता गराउने समय बिहीबार १२ बजेसम्म छ । राजपा प्रधानमन्त्री केपी ओलीको सरकारलाई समर्थन दिइरहेको पार्टी हो ।
लालले चिकित्सा शिक्षासम्बन्धी राष्ट्रिय नीति तर्जुमा उच्चस्तरीय कार्यदलको प्रतिवेदन, २०७२ हालसम्मका अनसनको मुख्य उपलब्धि भएकाले उक्त प्रतिवेदनको नाम ऐनको प्रस्तावनामै राखिनुपर्ने संशोधन प्रस्तावमा उल्लेख गरेका छन् । यो केसीको मुख्य मागमध्येको एक हो ।
उनको संशोधन प्रस्तावमा एउटा विश्वविद्यालयले ५ भन्दा बढी मेडिकल कलेजलाई सम्बोधन दिन नपाइने व्यवस्था विधेयकमा राख्नुपर्ने उल्लेख छ ।
‘अन्यत्र जेसुकै लेखिएको भएता पनि आइन्दा एक विश्वविद्यालयले ५ भन्दा बढी शिक्षण संस्थालाई सम्बन्धन दिन सक्ने छैन । यसअघि सम्बन्धन दिइसकेको चिकित्सा शिक्षण संस्थामा यो प्रावधान लागू हुने छैन । काठमाडौं बाहिरका शिक्षण संस्थाको हकमा आयोगले नीति निर्माण गरी निर्णय गरेबमोजिम हुनेछ’ भन्ने व्यवस्था विधेयकमा थप्न लालले प्रस्ताव गरेका छन् ।
प्राविधिक शिक्षा तथा व्यावसायिक तालिम परिषद (सीटीईभीटी) अन्तर्गतका प्रवीणता प्रमाणपत्र तह (पीसीएल) मुनिका स्वास्थ्य शिक्षासम्बन्धी कार्यक्रमलाई क्रमशः ५ वर्षभत्र ’फेज आउट’ गर्ने व्यवस्था विधेयकमा राख्नुपर्ने लालले संशोधन प्रस्तावमा उल्लेख गरेका छन् ।
No comments:
Post a Comment