मृतकको नाममा भत्ता बुझ्ने विरुद्ध मुद्दा

काठमाडौं, २२ पुस– अख्तियार दुरुपयोग अनुसन्धान आयोगले मृत र बसाइँसराइ गरिसकेका व्यक्तिहरूको नाममा सामाजिक भत्ता दुरुपयोग गरी खाएको अभियोगमा तत्कालीन गाविस सचिव रेवतीकुमार कोइरालासहित तीन जनाविरुद्ध आइतबार भ्रष्टाचार मुद्दा दायर गरेको छ । विशेष अदालतमा मुद्दा दायर गरिएकामा कोइरालाका अतिरिक्त भोजपुरको साबिक दुम्माना गाउँ विकास समिति हाल आमचोक गाउ“पालिकाका कर्मचारी मनिष चौधरी र टेकबहादुर श्रेष्ठ छन् ।

मृत र बसाइँ सरेका व्यक्तिहरूको नाममा फर्जी औंठाछाप लगाई सामाजिक सुरक्षा भत्ताको रकम खाई भ्रष्टचार गरेकाले उनीहरूविरुद्ध मुद्दा दायर गरिएको अख्तियारले जनाएको छ । अख्तियारले अभियोगपत्रमा कोइरालालाई ८३ हजार, चौधरीलाई २ लाख ५० हजार र श्रेष्ठलाई २ लाख २७ हजार रुपैयाँ बिगो कायम गरी जरिवाना र जेल सजाय गर्न माग दाबी गरेको छ ।